2021 jyldyń 1 aqpanynda Instagram áleýmettik jelisinde Taldyqorǵan qalasynyń kósheleriniń birinde bir top adamnyń miting ótkizip jatqan beineroligi jariialanǵan bolatyn. Keshe Taldyqorǵan ákimshilik soty osy mitingti ótkizýshilerge qatysty isti qarady, – dep habarlaidy Almaty oblystyq sotynyń baspasóz qyzmeti.
Oqiǵa bolyp jatqan jerge quqyq qorǵaý organdarynyń ýákiletti qyzmetkerleri kelip, mán-jaidy anyqtaý kezinde miting ruqsat etilmegendigi anyqtalǵany aitylady. Belsendi tulǵanyń birine uiymdastyrýshy, al qalǵan tulǵalarǵa qatysýshy degen mártebe berilip, Qazaqstan Respýblikasy «Ákimshilik quqyq buzýshylyq týraly» kodeksiniń 488-babynyń bólikterimen hattamalar toltyrylyp, is materialdary sotqa joldanǵan.
8 aqpan 2021 jyly Taldyqorǵan ákimshilik soty «Beibit jinalystardy uiymdastyrý jáne ótkizý tártibi týraly» zańnamany buzǵan bir top azamattarǵa qatysty ákimshilik is materialdaryn qarady. Sot is materialdaryn zerdelep, quqyq buzýshylardan jaýap alyp, jaýapqa tartylýshylardyń minez-qulqyna baǵa bere kele, sotqa ÁQBtK-tiń 488-babynyń 7-bóligimen berilgen K.-nyń is-áreketi ÁQBtK-tiń 488-babynyń 6-bóligine qaita saralanyp (uiymdastyrýshy mártebesi qatysýshy bolyp ózgertilip), sotqa berilgen tulǵalardyń barlyǵy kináli dep tanylyp, barlyǵyna tek «ákimshilik eskertý» berýmen shekteldi,-delingen habarlamada.
