I. Jansúgirov atyndaǵy Mádeniet saraiynda Eskeldi Jylkeldiulynyń 325 jyldyǵyna jáne Elbasynyń «Bolashaqqa baǵdar: rýhani jańǵyrý» atty baǵdarlamalyq maqalasyna orai «Erligi mura - Eskeldi» atty respýblikalyq ǵylymi-tájiribelik konferentsiia ótti.
Konferentsiia «Er Eskeldi» atty beinefilmmen ashyldy. Munan soń jiynnyń resmi bóligin oblys ákiminiń orynbasary Jaqsylyq Omar ashty. Jiynda M. Áýezov atyndaǵy Ádebiet jáne óner institýtynyń bólim meńgerýshisi, fililogiia ǵylymdarynyń kandidaty Taqtar Álibekov baiandama jasap, Eskeldi bidiń áýlieligi, kóregendigi, sheshendigi, ádildigi, áskeri isti jetik biletin sheberligi, syrtqy saiasatta da salmaǵy zor iri qairatkerligi jaily keńinen baiandady. Munan soń I. Jansúgirov atyndaǵy Jetisý memlekettik ýniversitetiniń oqytýshysy, tarih ǵylymdarynyń kandidaty, dotsent Kúlimkóz Santaeva jońǵar shapqynshylyǵy jyldaryndaǵy Eskeldi bidiń erligi týraly sóz qozǵady. Konferentsiiada Eskeldi Jylkeldiulynyń ómiri men qazaq tarihyndaǵy orny taqyrybynda taǵy birneshe ǵalymdar sóz aldy.
Uiymdastyrýshylardyń aitýynsha, ǵylymi konferentsiiada jasalǵan baiandamalardyń basy biriktirilip, arnaiy jinaq shyǵarylmaq.
Jalpy mereitoilyq is-shara konferentsiia aldynda Eskeldi babanyń kesenesine gúl qoiý rásimimen bastalǵan. Eskeldi bidiń 325 jyldyq toiy tústen keiin Respýblikalyq aqyndar aitysymen jalǵasty. Aitysqa halyqtyń yqylasyna bólenip júrgen Balǵynbek Imashev, Ainur Tursynbaeva, Sara Toqtamysqyzy syndy sýyryp salma aityskerler shaqyrylǵan. Eskeldiniń erligi men biligin, kóregendiligin, tapqyrlyǵyn jyrlaǵan aqyndar jetisýlyqtardyń yqylasyna bólendi. Tartysty aitystyń bas júldesin Sara Toqtamysova - Semei qalasynan, I oryndy Jandarbek Bulǵaqov - Almaty oblysynan, II oryndy Ainur Tursynbaeva - Astana qalasynan, III oryndy Syrymbek Sərsembaev - Atyraý oblysynan, Eskeldi Jylkeldiuly atyndaǵy arnaiy júldeni Talǵat Myqi - Batys Qazaqstan oblysynan ielendi. 5 aqyn Jalǵas Sadyr, Arzygúl Qaiyńbek, Syrym Əýezhan, Balǵynbek Imashev, Əset Dúisebaev belsene qatysqany úshin aqshalai syilyqpen marapattaldy.
