Qazaqstan Respýblikasy Táýelsizdiginiń 25 jyldyǵyna orai Almaty oblysynyń ortalyǵy Taldyqorǵan qalasynda elimizdiń Tuńǵysh Prezidenti Nursultan Ábishuly Nazarbaevtyń músininiń saltanatty ashylýy ótti, dep habarlaidy "Ult aqparat" Almaty oblysy ákimdiginiń resmi saityna silteme jasap.
Aita ketý kerek, osydan biraz ýaqyt buryn Prezidenttiń músinin ornatý týraly bastamany jetisýlyq ardagerler kóterip, ol oblystyq máslihat depýtattarynyń qyzý qoldaýyna ie bolǵan edi. Osy igi bastama júzege asyrylyp Elbasy músini Taldyqorǵannyń ortalyq alańyndaǵy Qazaqstan Respýblikasy Tuńǵysh Prezidentiniń skverine ornatyldy.
Saltanatty jiyn Qazaqstan Respýblikasynyń Memlekettik Gimnimen bastalyp, músinniń ashylýyna orai shashý shashyldy. 1 jeltoqsan - Tuńǵysh Prezident kúnimen jáne aitýly oqiǵamen kópshilikti oblys ákimi Amandyq Batalov quttyqtady.
- Prezidentimizdiń kópqyrly qyzmetiniń aýqymdylyǵy, biik bedeli Qazaqstannyń árbir azamatyna etene tanys. Biz, Almaty oblysynyń turǵyndary Elbasynyń músinin ornata otyryp, ózimizdiń shynaiy yqylasymyzdy, riiasyz alǵysymyzdy, zor qurmetimizdi bildiremiz. Memleket basshysynyń músini óziniń týǵan jerinde ornatylýy zańdylyq. Táýelsizdiktiń 25 jylynda Ult Kóshbasshysy qazaqstandyq qoǵamnyń biriktirýshi faktory, turaqtylyqtyń, gúldený men órkendeýdiń simvolyna ainaldy, - dei kele kópshilikti osy aitýly oqiǵamen quttyqtap aq tilegin aitty.
Munan keiin Almaty oblystyq ardagerler keńesiniń tóraǵasy Ermek Kelemseiit, Almaty oblysynyń Qurmetti azamaty, ardager Naýryz Qylyshbaev Elbasynyń eren eńbeginiń, saliqaly saiasatynyń jemisin kórip otyrǵan el aǵasy retinde ystyq lebizderin bildirdi.
- «Kóshbasshysy batyr bolsa, sarbazdary batyl bolady» degendei, Qazaq eli órkenietti elý eldiń qatarynan ózine laiyqty oryn aldy. Endi damyǵan otyz eldiń qataryna qosylý – Elbasynyń ǵana emes, barsha qazaqstandyqtardyń basty mindeti. Temirqazyq nysanadan kóriný – abyroily da aibyndy elge tán qasiet. Mine, osy rette jetisýlyqtar iriliktiń de, ulylyqtyń da úlgisin kórsetip keledi. Endi, mine, qabyrǵaly Qazaq eliniń atyn álemge pash etip, asyl muratyna jetken Nursultan Ábishuly Nazarbaev jerlesterimen qaýyshyp tur. Táýelsizdikti baiandy etý jolynda bir atanyń balalaryndai jumylyp, janartaýdai jarqyldaýǵa shaqyryp tur! Endeshe iske sát! - dedi N. Qylyshbaev.
Munan soń sóz alǵan «Hilnichenko i K» komandittik seriktestiginiń direktory Viktor Hilnichenko:
- Men Nursultan Ábishuly Nazarbaevpen 20 jyldan beri jaqsy tanyspyn. Ol elimizdegi aýyl sharýashylyǵynyń damýyn qalt jibermei qadaǵalap otyrady. Qoldaý kórsetip, keńes beredi, onyń damýyndaǵy jańa jetistikterdi eshqashan nazardan tys qaldyrǵan emes.
Men osyndai kópqyrly, talantty, kóregen memleket basshysymen tildesýge, pikirlesýge múmkindik jasaǵan taǵdyryma rizamyn. Jáne Almaty oblysy turǵyndarymen birge Elbasy Nursultan Ábishuly Nazarbaevtyń Prezident retindegi, bedeli zor álemdik saiasatker retindegi eńbegi úshin oblysymyzda, óziniń týǵan jerinde músini ornatylǵanyna qýanyshtymyn, - dedi.
Jastardyń atynan quttyqtaý sóz sóilegen I.Jansúgirov atyndaǵy Jetisý memlekettik ýniversitetiniń stýdenti Aizada Orazaly óz sózinde Elbasynyń jastarǵa jasap otyrǵan qamqorlyǵy, bilim alýǵa, eńbek etýge jasalǵan zor múmkindikteri jaily aita kele, jastar Elbasymyzdy maqtan tutyp qana qoimai, keleshek urpaq úshin jasalyp jatqan jaqsylyqtardy durys baǵytqa paidalana bilip, eselep qaitarýy qajettigin atap ótti. Jer jannaty Jetisý jerinde boi kóterip otyrǵan Kóshbasshymyzdyń músininiń ashylýy – barsha qazaq jurty úshin úlken qýanysh ekenin jetkizip, sóziniń sońyn «Uly Dalanyń Ult kóshbasshysy Elbasymyz Máńgi jasai bersin!!!» degen jalyndy tilekpen aiaqtady.
Saltanatty shara kontserttik baǵdarlamamen jalǵasty.
Aita ketsek, Elbasy músini Taldyqorǵandaǵy ortalyq alańnyń ońtústik-shyǵysynda ornalasqan Qazaqstan Respýblikasy Tuńǵysh Prezidentiniń skverine qoiyldy. Músinniń avtory: QR qurmetti sáýletshisi, «Qurmet» ordeniniń kavaleri, 40-tan astam eskertkishtiń avtory Qazbek Jarylǵapov jáne tanymal músinshi, Sýretshiler odaǵynyń múshesi, 20-dan astam eskertkishtiń avtory Mirlan Azmaǵanbetov.
Músinniń biiktigi 4,2 metr, qoladan jasalǵan, al tuǵyrynyń biiktigi 4,5 m., kúrtilik qońyr granitten jasalǵan. Músinnen keiin skver Qazaqstan Respýblikasynyń memlekettik rámizderiniń alleiasymen jalǵasady. Skverdegi júrginshi jolynyń eki jaǵynda granit qabyrǵada Qazaqstan Respýblikasy Memlekettik rámizderi qoladan jasalǵan:
- Qazaqstan Respýblikasy Eltańbasy;
- Qazaqstan Respýblikasynyń Memlekettik Týy;
- Qazaqstan Respýblikasynyń Gimni;
- Qazaqstan Respýblikasy Konstitýtsiiasy Kitaby.
