Taldyqorǵanda balabaqshanyń ekinshi qabatynan qulap ketken qyzǵa qatysty tyń derekter shyqty. Jelide videobaqylaý kamerasynyń jazbasy jariialandy.
Videoda "Qarlyǵash" balabaqshasynyń qyzmetkeri qyzdy kóterip, ashyq turǵan terezeniń aldyndaǵy taqtaiǵa turǵyzady. Tárbieshi onyń janyna taǵy bir balany alyp keledi. Olar terezeniń aldyna syimai, birin-biri itere bastaidy da, qyz moskit toryna súienedi. Tor salmaqty kótere almai, balamen birge syrtqa túsip ketedi.
Ǵimarattyń syrtyndaǵy kameradan túsirilgen taǵy bir jazbada qyzdyń ekinshi qabattan qulaǵan sáti kórinedi.
Keshe Taldyqorǵan politsiiasynyń ókilderi balanyń qulaý faktisi boiynsha qylmystyq is qozǵalǵanyn málimdedi. Qyz oblystyq aýrýhananyń jan saqtaý bóliminde jatyr, dárigerler onyń jaǵdaiyn turaqty aýyr dep baǵalap otyr.
Aita keteiik, №19 mektep-gimnaziiaǵa qarasty shaǵyn ortalyqtyń ekinshi qabatynan qulaǵan balanyń ata-anasy sol mektepte jumys isteitin bolyp shyqty.
№19 mektep-gimnaziiasynyń direktory Qairat Sarqytovtyń aitýynsha, bala shaǵyn ortalyqqa eki kún buryn ǵana qabyldanǵan. Al eki jasar qyzdyń ákesi - dene tárbiesiniń, al anasy - bastaýysh synyp muǵalimi.
«Shaǵyn ortalyqtyń ashylǵanyna on jyl boldy. Tárbieshiniń de bul jerde jumys istep jatqanyna 10 jyl ýaqyt bolǵan. Óte tájiribeli maman. Oqiǵa jaily basqa eshteńe aita almaimyn. Politseiler tergeý júrgizip jatyr»,-dedi Qairat Sarqytov.
