Almaty oblysynda epidemologiialyq ahýaldyń jaqsarýyna bailanysty Taldyqorǵan qalasyndaǵy eki provizorlyq ortalyq jabyldy, dep habarlaidy "Ult aqparat".
Densaýlyq saqtaý basqarmasynyń basshysy Ómirzaq Niiazbekov provizorlyq statsionarlardy kezeń-kezeńmen konservatsiialaý bastalǵanyn aitty.
«Búginnen bastap Taldyqorǵan qalasyndaǵy áskeri gospitalda ashylǵan provizorlyq ortalyq jabylyp, gospital qalypty jumysyn bastady. Sonymen qatar, oblystyq teri-venerologiialyq dispanser de josparly túrde naýqastardy qabyldaýǵa daiyn», - dedi basqarma basshysy.
Sonymen qatar, Densaýlyq saqtaý basqarmasynyń basshysy Ómirzaq Ábelseiitulynyń aitýynsha, oblystaǵy statsionarlar júktemesiniń tómendeýine bailanysty infektsiialyq tósek sany 520-dan 490 orynǵa, provizorlyq tósek sany 3560-tan 2541 orynǵa deiin qysqartylǵan.
Búgingi kúni Almaty oblysynda ashylǵan provizorlyq ortalyqtarda 1043 adam em qabyldap jatyr. Osy ýaqytqa deiin 4048 adam jazylyp shyqty.
