Taldyqorǵanda 4 aidan beri jalaqysyn almaǵan avtobýs júrgizýshileri jumysqa shyqpai qoidy. Saldarynan qalada birneshe baǵyt boiynsha qoǵamdyq kólik júrmei, turǵyndar jaiaý qaldy, dep habarlaidy QazAqparat.
«Kúnde erteń, kúnde erteńmen jigitterdiń bári sharshady. Kóbi páter jaldap turady. Kredit bar. Ipoteka degen áńgime. Bular kúnde erteńmen eldiń bárin sharshatyp bitirdi. Búgin shyqpaǵan sebebimiz sol. Sonymen aqsha bergenshe shyqpaimyz, turamyz», - dedi avtobýs júrgizýshisi Nurdáýlet Túndebaev.
Avtopark basshylyǵy jolaýshylar tasymaly shyǵyny kóp sala degendi alǵa tartyp, jalaqynyń kesheýildeýine pandemiia sebep bolǵanyn aitady. Qala biýdjetine alaqan jaiǵan kásiporyn karantinde oqýshy tasymaldaýǵa bólinetin sýbsidiiadan qaǵylǵan kórinedi.
«Jolaýshylar tasymalynyń shyǵyny kóp. Shyǵyn kóp bolǵannan keiin ákimdikke tólemimizdi beremiz. Sol tólemge qarap sýbsidiia jasaidy. Sýbsidiia jasaǵannan keiin ailyq bere alamyz, salyq tólei alamyz, qural-saiman ala alamyz. Bárin jasai alamyz», -dedi seriktestik direktory Bolat Tileýbaev.
Atqarýshy bilik bul seriktestik aldynda bereshegimiz joq deidi. Tipti kópbalaly analar tasymalyna bólinetin qarjynyń eki toqsandyq kólemin tólep qoiǵan. Al júrgizýshilerge jalaqy berilmeýiniń naqty sebepterin quzyrly organdar tekserip, anyqtaityn bolady.
