Tailand premer-ministri ári ishki ister ministri Anýtin Chanvirakýn el zańdaryn buzatyn sheteldikterdi elden ketýge shaqyrdy, dep habarlaidy ult.kz.
Premer sheteldikterdiń dini nysandar men jeke zirattar salýyna qatysty da pikir bildirdi. Buǵan jeke zirat salýǵa berilgen ótinish sebep bolǵan.
«Jaqynda jeke zirat salýǵa ótinish túskenin bildim. Bul shekten shyǵý. Biz sizderdiń elge kelýlerińizge ruqsat bergenimizge rizashylyq bildirýlerińiz kerek», – dedi Chanvirakýn.
Onyń aitýynsha, mundai bastamalar Tailand zańnamasyna sai bolýy jáne jergilikti qoǵam men mádeniettiń erekshelikteri eskerilýi kerek.
«Eger ólgińiz kelse, óz elińizge baryp ólińiz. Bul jerde ólýdiń qajeti joq», – dedi premer.
Ol sondai-aq sheteldikterdiń meiramhana ashýǵa ruqsat alyp, keiin ǵimaratty dini rásimder ótkizý úshin paidalanýyn jol berilmeitin jaǵdai dep atady.
Chanvirakýn Tailand sheteldik týrister men investorlar úshin ashyq ekenin, alaida bul olardyń jergilikti zańdardy buzýyna quqyq bermeitinin atap ótti. Onyń sózinshe, másele Aziia, Taiaý Shyǵys, Eýropa jáne Afrika elderiniń azamattaryna qatysty.
Premer jańa deportatsiia erejeleri zań buzǵan sheteldikterdi elden jedel shyǵarýǵa múmkindik beretinin aitty. Ol gýbernatorlarǵa áýe biletin kim tóleitinine bailanysty sheshimdi keiinge qaldyrmaýdy tapsyrǵan. Sheteldikterdi elden shyǵarý shyǵynyn memleket óteidi.
Jańa deportatsiia erejeleri 28 tamyzda kúshine engen.
Aita keteiik, buǵan deiin Tailandta reseilik týristerge shabýyl jasady degen kúdikpen birneshe jasóspirim ustalǵan. 14 qyrkúiekte Pattaiianyń bedeldi aýdanynda reseilik týristi uryp, tonaǵan. Kelesi kúni taǵy bir reseilik týrist qarý qoldanamyn degen qorqytý arqyly aqshasy men baǵaly zattaryn berýge májbúr bolǵan.
