Foto: KazAvtoJol
26 qańtardan bastap "Qyzylorda-Aral" jolynda júrý aqyly bolady, dep habarlaidy Ult.kz. Bul týraly"QazAvtoJol" málimdedi.
Qazirde osy ýchaskege 6 baqylaý arkasy jáne klienttermen jumys isteitin ortalyq qoiylǵan. Arkalarda ornatylǵan kameralar aqyly ýchaskelerde avtomobilderdiń qozǵalysy, olardyń jyldamdyǵy men qarqyndylyǵy, joldaǵy jaǵdai jáne taǵy basqa málimetter tirkeledi.
Endi avtojolda tólem beketteri bolmaidy. Jol júrý tólemi qolma-qol aqshasyz júrgiziledi. Búginde tólem jasaýdyń 10-ǵa jýyq ádisi bar.
Olar: internet-bankingter, tólem terminaldary men elektrondyq ámiiandar, uialy telefon balansynan, E100 janarmai kartasy jáne zańdy tulǵalarmen kelisim shart jasaý.
Bir baǵyttaǵy (454 shaqyrym) tólem mólsheri:
- 16 orynǵa deiingi avtobýstar jáne júk kótergishtigi 2,5 tonnaǵa deiin júk avtomobilderi úshin aldyn-ala tólem – 2840 teńge, keiingi tólem – 3330 teńge;
- 32 orynǵa deiingi avtobýstar jáne júk kótergishtigi 5,5 tonnaǵa deiin júk avtomobilderi úshin aldyn-ala tólem – 5750 teńge, keiingi tólem – 6740 teńge;
- 32 orynnan asatyn avtobýstar jáne júk kótergishtigi 10 tonnaǵa deiin avtopoezdar úshin aldyn-ala tólem – 8570 teńge, keiingi tólem – 10 100 teńge;
- júk kótergishtigi 10 tannandan joǵary jáne 15 tonnaǵa deiingi júk avtomobilderi úshin aldyn-ala tólem – 11 470 teńge, keiingi tólem – 13 470 teńge;
- júk kótergishtigi 15 tonnadan joǵary júk avtomobilderi, onyń ishinde tirkelgish jáne ershikti tartqyshtar úshin aldyn-ala tólem – 14 290 teńge, keiingi tólem – 16 830 teńge.
Aldyn-ala tólem áldeqaida arzan, sondyqtan tólemaqyny ýaqtyly jasaǵan durys.
Aita ketý kerek, jeńil kólik ieleri Qyzylorda-Aral jolyn tegin paidalanady. Jergilikti turǵyndar úshin bir ailyq jáne bir jyldyq abonementter qarastyrylǵan.
