Túrkistanda taekvondodan ótken Súiilish batyrdy eske alýǵa arnalǵan IV respýblikalyq týrniri óz máresine jetti, dep habarlaidy «Ult aqparat» oblys ákimdiginiń baspasóz qyzmetine silteme jasap.
Jalpy jarysta Ózbekstan, Qyrǵyzstan, Tájikstan memleketteri jáne elimizdiń barlyq aimaǵynan kelgen 700-den astam sportshy baq synady. Dástúrli týrnirde kadetter, jastar men jasóspirimder 50 salmaq dárejesi boiynsha synǵa tústi.
Súiilish batyr kásibi sport klýbynyń prezidenti Erjan Nurshilovtyń demeýshiligimen ótken saiys júldegerleri diplom jáne medaldarmen marapattaldy. Jastar jáne jasóspirimder arasynda birinshi oryn alǵan sportshylar men jattyqtyrýshylaryna qarjylai syilyq tabystaldy.
Komandalyq esepte birinshi oryn alǵan elordalyq Qajymuqan sport klýbynyń ókilderi «Súiilish batyr» atyndaǵy aýyspaly belbeýin ielendi. Jarystyń bas tóreshisi Dáýren Alǵabaevtyń aitýynsha, ereje boiynsha qai komanda eki jyl qatarynan jeńimpaz atansa, belbeý sol komanda qorjynyna buiyrady.
Túrkistan oblysynyń talantty sportshylary jeńiske jetip, ózderiniń myqtylyqtaryn kórsetti. Jastar arasynda óńir namysyn qorǵaǵan 55 kelidegi Ǵani Qulymbet pen 68 kelide óner kórsetken Nazym Mahmutova, 32 kelide Zarnigor Tolkinovalar altyn alqanyń iesi atandy. Al, jasóspirimder arasynda synǵa túsken 28 kelide Shuǵyla Myrzahan men 34 kelidegi Aisáýle Mahambetke teń keler qarsylas bolmady.
