Ult josparynyń 57-qadamynda «Týristik klasterler qurýda úzdik tájiribesi bar strategiialyq (zákirlik) investorlar tartý» tapsyrmasy qoiyldy. Bul oraida Shýche-Býrabai kýrortty aimaǵyn damytýdyń keshendi josparyna qatysty sharalar oidaǵydai atqarylýda.
Aqmola oblystyq týrizm basqarmasynyń málimdeýinshe, byltyr týrizm salasynda 8 joba júzege asyrylǵan. Bul maqsatta sheteldik jáne qazaqstandyq investorlar qarjysy tartylǵanyn aita ketý kerek. Munyń bári álemdik deńgeidegi týristik ortalyqty qurýǵa baǵyttalǵan. Jyl saiyn atalmysh aimaqta 5-10-ǵa deiin týristik infraqurylym nysany boi kóterýde. Onyń ishinde «Rihos» qonaq úiin, «Qazaqstan Laplandiiasy» oiyn-saýyq keshenin, ár túrli baǵyttaǵy májilis zaly men bólmeleri bar «Haýs parkin» atap ótýge bolady.
Qazirgi tańda óńirlik týrizmdi damytýǵa Resei men Qytai investorlary airyqsha qyzyǵýshylyq tanytyp otyr. Sondai-aq, týristik kompaniialar men uiymdar tarapynan da qarjy tartý máselesi belsendi sipat aldy. Ásirese, «Astana Leisure-2016» halyqaralyq kórmesi aqmolalyqtar úshin tabysty boldy. Biznes-forýmǵa týristik klasterdiń júzden astam ókili qatysýy Býrabaidyń tartymdylyǵyn aishyqtaýǵa úlken áser etti. Aqmolanyń týristik alańynda jergilikti 27 firma óz jobalarynyń tanystyrylymyn ótkizdi.
Halyqaralyq kórme jumysy aiasynda oblystyń týristik uiymdary otandyq jáne sheteldik 100 týristik operator kelisimshartqa qol qoisa, týristik biznestegi 300 áriptespen yntymaqty bailanys ornatý niettestigine arna tartyldy. Osy transkontinentaldyq kórmeni uiymdastyrýshylar tarapynan aqmolalyqtardyń «Eń úzdik kórme ekspozitsiiasy» atalymyna laiyq degen uiǵarymy oblystaǵy týristik áleýettiń joǵarylyǵyn aiqyndaidy.
Baqbergen AMALBEK,
«Egemen Qazaqstan»
Aqmola oblysy
.jpeg)