Foto: Samuryq-Qazyna
«Samuryq-Qazyna» aktsionerlik qoǵamynyń kooperativti basqarý, áleýmettik-eńbek qatynastary jáne eńbekti qorǵaý jónindegi basqarýshy direktory Ǵibrat Aýǵanov Májilis depýtaty Erlan Sairovtyń qorǵa tiesili enshiles kompaniialardyń basshylyq quramǵa syiaqy tóleý saiasaty týraly saýalyna pikir bildirdi, dep habarlaidy QazAqparat agenttigi.
Ǵibrat Aýǵanov jazda ǵana qoǵamda rezonans týǵyzyp, túsindirme jumystary júrgizilgen málimettiń kúzde Májilis minberinen qaita kóterilgenine tańǵalyp otyr.
«Bul másele shilde aiynda aitylyp, búkil BAQ-qa túsindirme retinde aqparat bergenbiz. Tipti KASE alańynda osy máselege bailanysty baspasóz máslihatyn da ótkizdik.
Nelikten búgin qoiylǵanyn bilmeimin. Eki ai boldy. E.Sairov myrza qoǵamdyq keńestiń otyrysyna kelgen joq. Ózinen suraityn edik. Qoǵamdyq otyrystarda da jaýap bergenbiz», - deidi ol.
Aktsionerlik qoǵam ókili depýtat saýalynda atalǵan kompaniia qyzmetkerleriniń ailyǵy men syiaqylaryn tómendetýge bolmaidy degen paiym aitty.
«Nege tómendetýge bolmaidy? Bizdiń kompaniialarymyz – ulttyq kompaniialar. Jalpy «Samuryq-Qazynada» 270-ten astam enshiles kompaniia bar. Ár kompaniia – naryq. Mysaly, bir kompaniianyń basshysyn alaiyq. Ol laýazymǵa taǵaiyndalý úshin tiisti bilimi bolý kerek. Jaýapkershilik alady. 5 myń, 10 myń jumysshyǵa jaýapty bolady. Onyń báriniń biznes kórsetkishterin, qarjylyq kórsetkishterin oryndaý kerek. Qazaqstannyń damýyna úles qosatyn, soǵan naqty laiyqty basshy bolý kerek. Naqty laiyqty basshy bolý úshin, naqty laiyqty jalaqy bolý kerek», - deidi aktsionerlik qor direktory.
Aitýynsha, basshylar men menedjerlerdiń ailyǵy men syiaqysyn tómendetse, qazirgi qyzmetterinde turaqtap qalmaýy múmkin.
«Bizdegi problemanyń biri mynadai: Bizdiń jaqsy menedjerlerimizdi ishki naryq, ishki biznes básekelestik jolmen tartyp alady. Jalaqysyn bizdegiden kóterip usynady da, biz daiyndaǵan mamandardy alyp ketedi. Sol sebepti basshylarǵa tóleitin syiaqyny tómendetý máselesin koporativtik reglamentter sheshedi. Ár kompaniianyń sharttary, erejeleri bar. Biz operatsiialyq máselelerge kire almaimyz. Ár kompaniiaǵa «basshylarǵa mynansha tóle» dep mindet qoia almaimyz. Sebebi limit bar. Limitterdi qaita qarap jatqan joqpyz. Biraq biz 2022 jyldan bastap eń tómen jalaqy alatyn jumysshylardyń ailyǵyn Qazaqstandaǵy ortasha jalaqyǵa deiin kóterý baǵytynda úlken jumys atqaryp jatyrmyz», - dedi Ǵibrat Aýǵanov.
Eske salsaq, Májilis depýtaty «Samuryq-Qazyna» qory qurylymyndaǵy kompaniialardyń qarjylyq operatsiialaryn tekserýdi suraǵan bolatyn.
