Foto: gov.kz
Premer-ministrdiń orynbasary – syrtqy ister ministri Murat Nurtileý Qazaqstanda akkredittelgen diplomatiialyq missiialardyń basshylary men halyqaralyq uiymdardyń ókilderine aýyzashar ótkizdi, dep habarlaidy Ult.kz QR SIM baspasóz qyzmetine silteme jasap.
Kezdesýdi asha otyryp, syrtqy saiasi vedomstvosynyń basshysy oi tolǵaýdy, birlikti jáne igi isterdi beineleitin qasietti Ramazan aiynyń rýhani mańyzdylyǵyn atap ótti.
"Ramazan – oraza aiy ǵana emes, rýhani qundylyqtardy nyǵaitý, ózara syilastyq pen yntymaqtastyq ýaqyty. Qazaqstan árqashan beibitshilikti, tatý kórshilikti jáne halyqaralyq yntymaqtastyqty jaqtap keledi jáne bul qaǵidattar ózgermeidi", – dep málimdedi ministr óz sózinde.
M.Nurtileý jahandyq syn-qaterlerge qaramastan Qazaqstan beibitshilik pen turaqtylyqty qoldaýǵa baǵyttalǵan syndarly syrtqy saiasatty júrgizýdi jalǵastyryp jatqanyn jetkizdi. Ol 2024 jylǵy elimizdiń musylman eldermen yntymaqtastyǵyn qorytyndylap, 2025 jylǵa arnalǵan ózara is-qimyldyń basym baǵyttaryn belgiledi.
Sońǵy jyldary Qazaqstan saýda-ekonomikalyq seriktestikti, kólik logistikasyn jáne gýmanitarlyq yntymaqtastyqty damyta otyryp, musylman álemimen bailanystardy aitarlyqtai nyǵaitqany atalyp ótti. Bul kúsh-jiger barlyq tarap úshin jańa perspektivalar ashyp, eleýli nátije berýde.
SIM basshysy ekijaqty jáne kópjaqty bailanystardy damytýǵa belsendi qatysqany úshin diplomatiialyq korpýsqa alǵysyn bildirip, Qazaqstannyń Almatyda Ortalyq Aziia men Aýǵanstan úshin Ornyqty damý maqsattary boiynsha BUU Óńirlik ortalyǵyn qurý jónindegi bastamasyna qoldaý bildirgenine erekshe nazar aýdardy.
Sheteldik diplomattar jyly qabyldaý úshin alǵys aityp, Qazaqstanmen seriktestikti odan ári nyǵaitýǵa beiildiligin rastady.
Diplomatiialyq korpýsqa arnalǵan aýyzashar senim, ózara túsinistik pen halyqaralyq yntymaqtastyqty nyǵaitýǵa yqpal etetin mańyzdy dástúrge ainaldy.
