Almatyda syrqattyń dertin kópshilikke jariia qylǵan dáriger jumystan shyǵaryldy. Máseleniń mán jaiyn qalalyq sot málimdedi, dep habarlaidy "Ult aqparat".
Is materialdaryna sáikes, byltyr 25 mamyr men 26 maýsym aralyǵynda súiek hirýrgiiasy bóliminde em alǵan adam 12 maýsymda COVID - 19 indetine shaldyqqany belgili bolǵan. Patsient bólek palataǵa aýystyrylǵan.
«Al 5 maýsymda dáriger syrqattyń emdeýshi dárigeri bolmasa da, eńbek demalysynda júre turyp, jumys ornyna kelgen. Syrqatty jáne onyń diagnozy jazylǵan emdik kartochkasyn, qandai em júrgizilgenin jáne meditsinalyq mekemege jasaǵan ótinimin fotosýretke túsirip, ony blogerlerge taratqan. Bul aqparat áleýmettik jelige tarap ketken. Eńbek kelisim sharty boiynsha kúdikti 2016 jyly №4 qalalyq aýrýhanaǵa dáriger-hirýrg bolyp jumysqa ornalasqan. 2020 jyldyń tamyz aiynda buiryq shyǵarylyp dáriger jumystan bosatyldy»,- dedi qalalyq sottyń baspasóz qyzmetinen.
«Áleýmettik jelide dárigerdiń kásibi biliktiligine qaramastan jumystan zańsyz shyǵaryldy degen pikir tarap jatyr. Naqty bul jaǵdaida aq halattynyń kásibi sheberligine sot esh kúmán keltirmegen. Alaida, zań barshaǵa ortaq. Zańdy belden basý jáne ózgeniń quqyna qol suǵýǵa jol joq» - dedi qalalyq sot mamandary.
Buiryqqa kelispegen ári, jumysqa qaitarýdy talap etip dáriger sotqa shaǵym túsirgen. Onyń aitýynsha, kelisim komissiiasynyń bul sheshimi negizsiz.
«Dárigerdiń meditsinalyq qupiiany úshinshi bir adamǵa jariia qylǵanyn bilgen syrqat meditsinalyq mekeme basshylyǵyna shaǵymdanǵan. Al sotqa shaǵym berýshi dárigerdiń aitýynsha indetti juqtyrǵan adam santiarlyq-epidemiologiialyq sharany esh saqtamaǵan. Sol sebepti indettiń tarap ketý qaýpi tóngen. Alaida meditsinalyq qupiia 2020 jyldyń 5 shildede jariialanǵan. Al syrqat 26 maýsym 2020 jyly tolyq emdelip, úiine shyqqan», - dedi sot mamandary.
Sondai-aq, sotta belgili bolǵany shaǵym berýshi dáriger syrqattyń indetti ózgerelerge juqtyrýy múmkin ekeni, qandai da bir qaýip tónip turǵany turaly meditsinalyq mekeme basshylaryna aitpaǵan.
Qazaqstan zańnamasyna sáikes memlekettik jáne zańmen qorǵalǵan qupiialardy jariia etkende, eńbek mindetin atqarǵan kezde belgili bolǵan aqparattardy qupiia saqtamaǵany úshin jumys berýshi jumysshymen eńbek kelisimshartyn joia alady.
Em qabyldaǵan azamattyń jeke meditsinalyq anyqtamalary, meditsinalyq kómekke júgingeni týraly aqparat, syrqattyń densaýlyǵy, diagnozy men basqa da málimetterdi dárigerler qupiia ustaýǵa mindetti.
«Dárigerdiń apelliatsiialyq shaǵymy qanaǵattandyrylmady. Sot meditsina qyzmetkeriniń kásibi biliktiligine esh kúmán keltirmeidi. Alaida meditsinalyq qupiiany jariia etýge jol joq», - dedi qalalyq sottyń baspasóz qyzmetinen.
