Qyzylorda qalasynyń turǵyndary Syrdariianyń sol jaǵalaýynda bastalǵan jańa qalanyń alǵashqy irgetasy qalanǵan tarihi sátke kýá boldy, dep habarlaidy "Ult aqparat" oblys ákiminiń baspasóz qyzmetine silteme jasap.
Memleket basshysy N.Á.Nazarbaevtyń «Qazaqstannyń úshinshi jańǵyrýy: jahandyq básekege qabilettilik» dep atalatyn Joldaýynda qurylys sektoryn damytyp, onyń otandyq ekonomikanyń tolyqqandy draiverine ainalýy tiis dep mindet qoiylǵan edi.
Joldaýdaǵy tapsyrmaǵa sáikes 2017 jyly oblys boiynsha barlyq qarjylandyrý kózderinen 2211 páterli 150,3 sharshy metrdi quraityn 40 kópqabatty turǵyn úi qurylysyn júrgizip, paidalanýǵa berý josparlanýda. Osy saladaǵy keń aýqymdy másele Syrdariianyń sol jaǵalaýynan Qyzylorda qalasynyń bas jospary negizinde jańa qala qurylysyn bastaý bolatyn.
Saltanatta oblys ákimi Q.Kósherbaev óz lebizin bildirdi.
– Biz búgin tarihi sáttiń kýási bolyp otyrmyz. Syrdariianyń sol jaǵalaýyn igerýdiń alǵashqy qadamy retinde byltyr dariia ústinen jańa kópir paidalanýǵa berildi. Búgin sol jaǵalaýdan 18 kópqabatty turǵyn úi men 320 oryndyq bala baqshanyń irgetasy qalanbaq. Bul nysandar qurylys kompaniialarynyń óz qarajaty esebinen salynǵaly tur. Al, 742 mln teńgeni quraityn balabaqsha qurylysy «Abý-Ser» JShS arqyly memlekettik-jekemenshik áriptestik aiasynda júrgiziletin bolady.
Sondyqtan, biznestiń áleýmettik jaýapkershiligin arttyrýǵa mol úles qosyp júrgen qurylys kompaniia basshylaryna, Syr qurylysshylaryna aimaq jurtshylyǵy atynan sheksiz alǵysymdy bildiremin.
Elbasy óz sózinde «Qazaqstannyń shirek ǵasyrdaǵy júrip ótken jolyn tek Qyzylorda oblysynyń ózinen kórýge bolady» degen-di. Shyn máninde, memlekettik tapsyrystardy oryndaý boiynsha da, Qyzylorda qalasyndaǵy qurylys jumystarynyń kólemi jaǵynan da aimaǵymyz Astanadan keiingi ekinshi oryndy ielenip tur.
Mine, búgingi kún halyqtyń igiligi úshin jasalyp jatqan tyń jobalardyń laiyqty jalǵasy, Syrdyń sol jaǵalaýynan boi kótergen jańa qala qurylysy bastaldy.
Bizdiń aimaǵymyzda jasalyp jatqan igilikti isterdiń barlyǵy da Elbasynyń tikelei qoldaýynyń jáne halyqtyń ál-aýqatyn arttyrýǵa baǵyttalǵan memlekettik baǵdarlamalardyń naqty kórinisi.
Sol jaǵalaýdaǵy ásem qalada bizdiń ulttyq tabiǵatymyzdy eske túsiretin naqyshta qalanǵan úiler boi kóteredi. Sondai-aq, bul jerde «Bolashaq» ýniversiteti, munan keiingi kezekte Qorqyt ata atyndaǵy ýniversitettiń bir oqý ǵimaraty, 600 oryndyq mektep, 500 kelýshige qyzmet etetin emhana, kórnekti neke saraiy salynatyn bolady, – dedi oblys ákimi.
Munan soń aimaq basshysy el aqsaqaldarymen birge alǵashqy kópqabatty úi men balabaqsha irgetasyn qalaý rásimine qatysyp, endigi jerde kún-túni tolastamaityn eńbek yrǵaǵyn bastap berdi.
