Shymkentte plastikalyq otadan keiin bir kóziniń kórý qabiletinen aiyrylǵan áieldiń isi boiynsha sot úkimi shyqty, dep habarlaidy ult.kz.
Tergeý málimetinshe, meditsinalyq qyzmet kórsetýge litsenziiasy joq áiel ózin bilikti maman retinde tanystyryp, jábirlenýshige blefaroplastika jasaýǵa kelisken. Tómengi qabaqty túzetý operatsiiasy úshin ol 100 myń teńge alǵan. Buǵan deiin dál osy patsientke qulaq pishinin ózgertý boiynsha da operatsiia jasaǵany belgili boldy.
Sot barysynda jábirlenýshiniń alǵashqy kezdesýden-aq mamannyń biliktiligine kúmándanǵany anyqtaldy. Degenmen aiyptalýshy óziniń joǵary meditsinalyq bilimi men qajetti qujattarynyń bar ekenin aityp sendirgen.
2025 jyldyń shildesinde jasalǵan qaitalama operatsiia kezinde aýyr asqynýlar týyndaǵan. Ota barysynda kóz mańynda qatty isiný men toqtatýǵa kelmeitin qan ketý baiqalǵan. Soǵan qaramastan patsient úiine jiberilip, jaǵdaiynyń ýaqyt óte jaqsaratyny aitylǵan.
Alaida arada on kún ótken soń áiel sol jaq kóziniń kórý qabiletin tolyq joǵaltqan. Keiin oǵan 100 myń teńge kóleminde ótemaqy tólengen.
Baqylaýshy organdar júrgizgen tekseris barysynda aiyptalýshynyń meditsinalyq litsenziiasy da, tiisti sertifikattary da joq ekeni anyqtaldy.
Sot ony kináli dep tanyp, 1 jyl 6 aiǵa bas bostandyǵynan aiyrdy jáne úsh jyl merzimge meditsinalyq qyzmetpen ainalysý quqyǵynan aiyrdy. Alaida kámeletke tolmaǵan balalarynyń bolýyna bailanysty jaza óteý merzimi bir jylǵa keiinge shegerildi.
Sonymen qatar sot moraldyq ziian men emdelýge jumsalǵan shyǵyndardy óndirip berý týraly sheshim shyǵardy.
