Shymkentte burynǵy kúieýi qyshqyl shashqan áieldiń isine qatysty jańa málimetter jariialandy, dep habarlaidy ult.kz.
Bul týraly áleýmettik jelidegi NeMolchiKZ qozǵalysy habarlady.
Qozǵalys ókilderiniń málimetinshe, kúdikti áieldiń telefonyna óziniń jańa nómirin baiqatpai saqtap, ony «Ainur klient» dep tirkegen.
Olardyń aitýynsha, shabýyldyń aldynda kúdikti sol nómirden áielge habarlasyp, tańǵy saǵat 5-te ushaq pen taksi daiyn bolatynyn aityp, sulýlyq salonyna shaqyrǵan. Áielge aqsha qajet bolǵandyqtan, úiine jaqyn ornalasqan salonǵa barǵan. Sol jerde er adam ony ańdyp turyp, kanistrdegi kúkirt qyshqylyn shashqan.
Jábirlenýshi shabýyl jasaǵan adamnyń kim ekenin birden túsinbegen. Óitkeni ol kaska, qolǵap jáne arnaiy kiim kigen.
Qazir áiel aýrýhanada em qabyldap jatyr. Oǵan tergeýshi kelip, qosymsha jaýap alǵany habarlandy.
Áleýmettik jelide jariialanǵan aqparatqa sáikes, kúdikti buǵan deiin eki ret úilengen. Jábirlenýshi onyń úshinshi áieli bolǵan. Sondai-aq onyń ártúrli nekelerinen balalary bar ekeni jáne aliment tólemegeni aityldy.
NeMolchiKZ ókilderi bul áreketti qasaqana jasalǵan qylmys dep baǵalap, politsiiadan kúdiktiniń qyshqyldy qalai satyp alǵanyn, onyń internettegi izdeý tarihyn, bank operatsiialaryn jáne shabýylǵa daiyndyq kezinde kimdermen bailanysqanyn tekserýdi surady.
Qazirgi tańda istiń naqty quqyqtyq saralanýy men kúdiktiniń kinási sotta anyqtalýy tiis.
