Úkimet basshysynyń birinshi orynbasary – qarjy ministri Álihan Smaiylov syrtqy qaryzdyń qalai jinaqtalǵanyn túsindirdi, dep habarlaidy Sputnik Qazaqstan.
"Jalpy, syrtqy qaryzymyz 160 milliard dollarǵa taiap qaldy. Biraq ótken jyldyń qorytyndysy boiynsha 8,4 milliard dollarǵa qysqardy", - dedi Smaiylov.
Ministrdiń aitýynsha, syrtqy qaryzdyń ishinde memlekettik sektordyń úlesi 35 milliard dollardy quraidy. Bul barlyq boryshtyń – 22 protsenti.
"Qalǵany – jekemenshik sektordyń qaryzy. Onyń kólemi – 123 milliard dollar nemese 78 protsent. Sonyń ishinde 100 milliardtan astamy – firmaaralyq borysh. Ol degenimiz, tikelei investitsiiamen bailanysty. Ondaida basqa memleketterdegi kompaniialar óziniń enshiles kompaniiasyna aqsha beredi, ol investitsiia bolyp sanalady. Biraq dál sol aqsha bizdiń tólem balansymyzda borysh retinde kórsetiledi", - dep atap kórsetti Smaiylov.
Onyń sózine qaraǵanda, Qazaqstanǵa salynǵan tikelei investitsiialardyń borysh retinde kórsetilgeni problema emes. Sol investitsiialardyń kóp bolǵany durys. Sebebi jańa jobalar qolǵa alynady, qosymsha jumys oryndary ashylady, biýdjetke salyq tólenedi.
"Negizi, firmaaralyq boryshtyń kóp bolýy biz úshin jaqsy. Al Qytaidyń aldynda memlekettiń boryshy joq, tek jeke sektordyń qaryzy bar. Onyń kólemi – 11,6 milliard dollar. Sonyń jartysy – 5,1 milliard dollar firmaarlyq borysh, iaǵni Qytaidyń Qazaqstanǵa salǵan investitsiialary. Bank sektorynyń boryshy – 1,6 milliard dollar, al basqa sektorlar – 4,9 milliard dollar", - dedi Smaiylov.
