Shyǵys Qazaqstan oblysynda zamanaýi balyq ósirý jáne balyq ónimderin óńdeý óndirisin qamtityn keshendi investitsiialyq joba iske asyryla bastady, dep habarlaidy ult.kz.
Jobany «Zaisan See» seriktestigi qolǵa alady. Kásiporyn kókserke, shortan, alabuǵa syndy basqa da balyq túrlerin zamanaýi qarqyndy tehnologiialar arqyly ósirýden bastap, olardy bastapqy óńdeý, salqyndatylǵan jáne muzdatylǵan ónim óndirý, saqtaý, qaptaý jáne ishki ári syrtqy naryqtarǵa ótkizýge deiingi tolyq óndiristik tizbekti qamtamasyz etedi.
Jobaǵa 6 mln eýroǵa deiin investitsiia salý josparlanǵan. Oǵan Polsha Respýblikasynan sheteldik investor tartyldy.
Kásiporynnyń jobalyq qýaty jylyna 2 myń tonna daiyn ónimge eseptelgen. Óndiris ornynda 100 turaqty jumys ornyn ashý kózdelip otyr.
Keshenniń birinshi kezeńin 2027 jylǵy tamyzda paidalanýǵa berý josparlanǵan.
Jobany iske asyrý nátijesinde otandyq balyq ónimderin óndirý kólemi artyp, tereń óńdelgen ónim túrleri keńeiedi. Sonymen qatar óńirde jańa jumys oryndary ashylyp, biýdjetke túsetin salyq túsimderi ulǵaiady.
Joba aiasynda resýrsty únemdeitin zamanaýi tehnologiialardy engizýge erekshe mán berilip otyr. Bul óndiris tiimdiligin arttyrýǵa, sý jáne basqa da óndiristik resýrstardy utymdy paidalanýǵa múmkindik beredi. Sonymen birge qazaqstandyq balyq ónimderiniń eksporttyq naryqtarǵa shyǵýyna qosymsha jaǵdai jasalady.
Aldaǵy ýaqytta kásiporynnyń balyq ónimderin óńdeý qýatyn kezeń-kezeńimen arttyrý jáne salaǵa qajetti bilikti mamandardy daiarlaý júiesin damytý josparlanyp otyr.
Kásiporyn bazasynda jastardyń tiisti mamandyqtar boiynsha tájiribelik bilim alýyna múmkindik jasaý jáne balyq sharýashylyǵy salasynyń kadrlyq áleýetin qalyptastyrý kózdeledi.
