Qoǵamnyń barlyq salasyndaǵy sybailas jemqorlyq kórinisterin tómendetý boiynsha kúndelikti oqytý jáne tárbieleý búgingi tańda ózekti máselege ainaldy. Osy oraida keshe Memlekettik qyzmet isteri jáne sybailas jemqorlyqqa qarsy is-qimyl agenttigi bilim berý salasy ókilderiniń qatysýymen elimiz óńirlerimen beinebailanys arqyly jalǵanǵan selektorlyq keńes ótkizdi.
Agenttik tóraǵasynyń orynbasary Alik Shpekbaev atalǵan sharany asha otyryp, sybailas jemqorlyq strategiiasyn júzege asyrýdyń eń basty basymdyǵy ómir boiy sybailas jemqorlyqqa qarsy oqytý, aǵartý jáne tárbie berý bolyp tabylatynyn aitty. Qazirgi kezde agenttik, Bilim jáne ǵylym ministrligi EQYU-nyń Astanadaǵy ortalyǵymen birlese sybailas jemqorlyqqa qarsy kúreske oqytý jáne tárbie máselelerin bilim berý baǵdarlamasyna engizip otyr. Agenttik tarapynan sybailas jemqorlyqqa qarsy mektep oqýshylaryn tárbieleýdiń qanatqaqty baǵdarlamasy óńirlerge jóneltilgen. Jáne de agenttik bastamasymen 113 joǵary oqý ornynda «Sybailas jemqorlyqqa qarsy mádeniet negizderi» elektivti oqý páni engizilgen. Bul óz kezeginde qoǵamnyń barlyq salasyndaǵy sybailas jemqorlyq kórinisterin tómendetýge oń yqpal berýi tiis.
Osy turǵydan kelgende, A.Shpekbaev bilim berý júiesindegi sybailas jemqorlyqtyń aldyn alý jáne biznes-protsesterde adam faktoryn boldyrmaýdy avtomattandyrý erekshe mańyzǵa ie ekendigin alǵa tartty. Ásirese, bilim berý salasyndaǵy kez kelgen sybailastyq jaǵdaidy týǵyzatyn sebepterdiń aldyn alýǵa erekshe nazar aýdaryldy. Óitkeni, elimizde osy sala aitarlyqtai sybailas jemqorlyqqa urynǵan salalardyń biri bolyp sanalady. Keltirilgen málimetterge qaraǵanda, ótken jyldyń osy merzimimen salystyrǵanda biyl sybailas jemqorlyq kórsetkishteri 50 paiyzǵa artqan. Tek biyldyń 9 aiy ishinde bilim salasynda 61 qyzmetker qylmystyq jaýapkershilikke tartylypty.
Óńirler boiynsha qarastyrsaq, jazalanǵandardyń basym bóligi Qyzylorda, Qaraǵandy, Aqtóbe jáne Shyǵys Qazaqstan oblystarynan eken. Bilim berý salasy qyzmetkerleriniń basym kópshiligi ózderine senip tapsyrylǵan múlikti talan-tarajǵa salý men para alǵany úshin qylmystyq jazaǵa tartylypty. Al qylmystardyń deni oblystyq ákimdiktiń bilim berý basqarmalarynyń basshylary, bilim berý salasyn baqylaý jónindegi komitetter, direktorlar men esepshiler tarapynan jasalatyny belgili bolyp otyr. Ásirese, mektep direktorlary tarapynan biýdjet qarjysyn jymqyrýdyń júieli qaitalanýy oryn alýda. Tek ústimizdegi jyldyń 9 aiynda kolledjder men mektepter direktorlaryna qatysty 30 aiyptaý úkimi shyǵarylǵan. Mundai júieli zań buzýshylyqtar, ásirese, qoldan jasalǵan attestattar men sertifikattar berýmen, «óli jandarǵa» eńbekaqy tóleýmen, kadrlyq máselelerdi sheshýmen bailanysty urlyq jáne qyzmet babyn asyra paidalanýmen bailanysty kórinedi.
Asqar TURAPBAIULY,
«Egemen Qazaqstan»
.jpeg)