Foto: Astana ákimdiginiń resmi saity
Energetika ministri Almasadam Sátqaliev Májilistiń jalpy otyrysynan keiin BAQ ókilderiniń saýalyna bergen jaýabynda suiytylǵan gaz baǵasy benzin baǵasymen teńesýi múmkin ekenin málim etti, dep habarlaidy Kazinform.
«Bizde suiytylǵan munai gazyn tutyný kólemi kúrt ósip ketti. Ol negizi avtomobilderdi gazǵa aýystyrýmen bailanysty. Ásirese kólikterdi áýesqoi tásilmen gaz jaǵatyn etip qaita jabdyqtaý jappai beleń aldy. 9 aidyń ishinde suiytylǵan gazdyń óndirisinen týyndaityn teńgerim 25 paiyz artty. Bizge qosymsha kólemder izdeýge týra kelip otyr.
Biz «Teńizshevroilmen» kelissóz júrgizdik. Olar ishki naryqqa ai saiyn qosymsha 10 myń tonna jetkizip tur. Biz «QazMunaiGazdyń búkil kólemin ishki naryqqa baǵyttadyq. Osynyń esebinen teńgerimdi ustap turmyz. Iaǵni, qazir suiytylǵan gaz tapshylyǵy joq. Óńirlerde jetkizýden týyndaǵan máseleler bar shyǵar. Biz osyny problema dep otyrmyz», - dedi ol.
Ministr qazaqstandyqtarǵa kóligin gazǵa aýystyrýǵa asyqpaý kerek degen keńesin taǵy qaitalady.
«Mashinalardy osyndai qarqynmen gazǵa aýystyra beretin bolsa, keleshekte gaz óńdeý qýattarynyń áleýeti qysqa merzimdegi qajettilikterge jetpei qalýy múmkin. Tipti suiytylǵan munai gazyn importtaýǵa májbúr bolýymyz múmkin. Ol kezde baǵa múlde basqasha bolady. Tipti benzin baǵasymen salystyratyndai deńgeige shyǵýy yqtimal. Sondyqtan avtomobil tizgindeýshilerdi kólikterin gazǵa aýystyrýǵa asyqpaýǵa úndep júrmiz», - dedi Almasadam Sátqaliev.
