21 qańtar men 19 aqpan aralyǵynda Astana qalasynda «Álemniń uly áielderi» atty kórmesi ótti, dep habarlaidy "Ult aqparat".
Bul biregei jobanyń qatysýshylary Eýraziialyq óner odaǵynyń músheleri, Qazaqstan Respýblikasynyń kórkemsýret akademiiasynyń professorlary, oqytýshylar men Qazaqstan sýretshiler odaǵynyń ókilderi boldy. Bul is-shara Túrkiiadaǵy Qazaqstannyń bas konsýldyǵy jáne "Sultan" jýrnaly redaktsiiasynyń qoldaýymen uiymdastyryldy.
"Bul kórme arqyly biz qazaq áielderiniń sulýlyǵyn, olardyń ulylyǵy men batyrlyǵyn kórsetkimiz keldi. Kórmeni alǵash Ystambul qalasynda ótkizdik. Sýretshilerimizdiń týyndysyn 60 myńnan astam adam tamashalady. Is-sharanyń ashylýyna Túrkiianyń Týrizm ministri Ersoi Mehmet Nýri qatysty. Kelgen qonaqtar osy óner týyndylarynan shyqqan energiiaǵa riza boldy. Ásirese, "Zere", "Qyz Jibek" sýretteri qonaqtarǵa qatty áser etti. Rasynda da, olar qazaq áielderiniń sulýlyǵyna tań qaldy", - deidi kórmeni uiymdastyrýshy "Sultan" jýrnalynyń bas redaktory Qarakóz Aidash.
Túrki halyqtarynyń tarihynda teńdik, áieldi qurmetteý dástúri erteden bar. Túrki tarihynyń ártúrli kezeńderinde, iaǵni kóne dáýirden qazirgi zamanǵa deiin áielder qoǵamdyq ómirge belsene aralasqan. Onyń bir kórnekti mysaly retinde, Altyn Orda dáýirindegi túrki áielderiniń ákimshilikte mańyzdy qyzmetter atqaryp, áskeri is-qimyldarǵa qatysyp, ǵylym men ónerge qosqan úlesin aita alamyz.
Kórmede Saq patshaiymy Tomiristiń sýreti qonaqtardyń erekshe nazaryn aýdardy. Óitkeni ol áielderdiń tarihtaǵy jáne saiasattaǵy róliniń simvolyna ainaldy. Onyń beinesi ásirese, qazirgi áiel quqyǵy shektelgen ýaqytta áielderdiń máselesine nazar aýdarýdy, genderlik teńdik jáne áielderdiń qoǵamdy qalyptastyrýdaǵy áseri taqyrybyn talqylaýǵa shaqyrady.
Sondai-aq, Ekinshi Dúniejúzilik soǵysqa qatysqan batyr qyzdar Áliia Moldaǵulova men Mánshúk Mámetovanyń beinelerin jańǵyrtý kórmeniń eń bir utymdy tusy deýge bolady. Óitkeni, sýretshiler ózderiniń polotnolary arqyly tek fizikalyq uqsastyqtyǵyn ǵana emes, sonymen birge olar keiipkerlerdiń energiiasy men tabandylyǵyn kórsete aldy. Keneptegi ashyq túster men kóleńkeler batyr qyzdardyń erlik rýhyn erekshe aishyqtai túsken.
"Kórmedegi árbir sýret tek tehnikalyq sheberliktiń týyndysy ǵana emes, sonymen birge tereń maǵynaǵa ie. Onda áielderdiń qaitalanbas qasietteri, qoǵamǵa qosqan úlesi men yqpaly ashylady. Olardyń shyǵarmalarynda uly ister, qiyn jaǵdaidaǵy tabandylyq, quqyq pen progress úshin kúres taqyryptary beinelengen. Olar ár sýrettiń biregei ekenin jáne ony bólýge bolmaitynyn atap ótedi. Mundai shyǵarmashylyq protsesstiń sońǵy núktesi joq, sýretshiler týyndylaryn ondaǵan jyldar boiy úzdiksiz salyp, olardy bitpeitin protsess retinde qarastyryp, sýretterdiń detaldaryn tolyqtyryp, jetildire túsýge daiyn", - deidi osy kórmeniń sýretshileri Januzaq Músápir men Ádilǵali Baiandin.
Avtory: Tomiris Kazybekova
