Elordada Prezidenttik jastar kadrlyq rezervi músheleriniń klýby jumysyn bastady, dep habarlaidy QazAqparat.
Klýbtyń búgingi alǵashqy qonaǵy Memleket basshysy Qasym-Jomart Toqaevtyń shtattan tys keńesshisi, Prezident janyndaǵy reformalar jónindegi joǵary keńes tóraǵasynyń orynbasary jáne Eýropa qaita qurý jáne damý bankiniń eks-prezidenti Ser Sýma Chakrabarti boldy.
Sýma Chakrabarti óziniń jumysy týraly egjei-tegjeili baiandap, kóshbasshylyq týraly paiymdaryn ortaǵa saldy, klýb músheleriniń suraqtaryna jaýap berdi.
Prezident keńesshisi áńgime barysynda eldegi jańǵyrý protsesterindegi jastardyń róline kóbirek toqtaldy.
«Sizder búginniń ózinde kóshbasshysyzdar. Odan da mańyzdysy, kelekshektiń kóshbasshysysyzdar», - dep bastady áńgimesin Ser Chakrabarti.
Eki saǵatqa sozylǵan suhbat barysynda Sýma Chakrabarti klýb músheleriniń saýaldaryna jaýap berip, strategiialyq josparlaý, aýmaqtyq damý, memlekettik basqarý júiesi, Qazaqstan ekonomikasyna investitsiialardyń ulǵaiýy jáne basqa da taqyryptar tóńireginde áńgime órbitti.
Prezidenttik jastar kadrlyq rezerviniń músheleri Ser Chakrabartidiń saraptamalyq pikirin qorytyp, talqylanǵan máseleler men usynystardy iske asyrý tetigin qosymsha qarastyryp, daiyndaýdy josparlap otyr.
«Prezidenttik jastar kadrlyq rezerviniń músheleri – Qazaqstannyń patriot azamatttary. Qoǵamnyń ál-aýqatyn arttyrý jáne ómir súrý sapasyn jaqsartýdy, memlekettik qyzmet kórsetýdiń tiimdiligin qamtamasyz etýdi birinshi orynǵa qoiamyz. Ol úshin biz barlyq qoljetimdi syndarly alańdardy ashyq dialog retinde paidalanýǵa daiynbyz. Bizdiń rezervtegi áriptesterimiz óskeleń urpaq pen aldyńǵy býyn arasyndaǵy, memleket pen biznes arasyndaǵy bailanystyrýshy býynnyń rólin atqaryp otyr. Memlekettik qyzmettiń alańynda júrgendikten protsesterdegi, strategiialardaǵy qiyndyqtardy kórip, túsinip otyrmyz jáne osy ózgeristerge óz úlesimizdi qosa alamyz», - deidi klýb moderatory Aidyn Baiedilov.
Klýb músheleri de bul kezdesý kókeidegi kóptegen saýalǵa jaýap bergenin aitady.
«Jalpy, ashyq jáne taǵlymdy áńgime órbidi. Munda aitylǵan negizgi ideialar bolashaqta qabyldanatyn sheshimderge negiz bolady. Bul bizdiń rezerv múshelerin yntalandyrady jáne shabyttandyrady», - deidi jas maman Ásel Sársenbaeva.
Rezervtiń taǵy bir múshesi Almat Ahmatolla da óz oiyn aitty.
«Prezidenttik jastar kadrlyq rezervi bastamashyl jastardy biriktirip, olarǵa Qazaqstandaǵy úderister men turaqty damýdy odan ári jetildirý úshin bailanys, pikir almasý alańyn usynyp», - deidi Almat.
Uiymdastyrýshylar sharany koronavirýs infektsiiasynyń taralý qaýpin azaitýdy kózdeitin barlyq sanitarlyq-profilaktikalyq sharalardy saqtai otyryp ótkizgenin aitý kerek.
