QR Saýda jáne integratsiia ministri Baqyt Sultanov otandyq óndirýshilerden ishki suranysty azyq-túlik taýarlarymen qamtamasyz etýge kómektesýdi ótindi, dep habarlaidy "Ult aqparat".
«COVID-19 pandemiiasyna qarsy turý – bul bizdiń ortaq isimiz. Turaqtylyqqa degen senimniń quny asa joǵary. Óitkeni osyndai kezeńderde biz memleket naryqty azyq-túlikpen tolyqtyrý jónindegi óz mindettemeleri men málimdemelerin kepildi túrde oryndai alady degen senimge muqtajbyz. Bizdiń qazir jumys isteitin dárigerler men kez kelgen azamattyń dúkenge kirip, úiine qolaily baǵamen kez kelgen azyq-túlikti satyp alý múmkindiginiń bolýy tiis. Úkimettiń basty mindeti - óz naryǵyn azyq-túlikpen molyqtyrý. Qazir halyqty barlyq qajetti taýarlarmen jabdyqtaýda irkiliske jol bermeý asa mańyzdy. Bizdiń dúkenderde árqashan birinshi kezektegi mańyzdy taýarlar – nan, sút, jarma, et jáne kúndelikti qajetti basqa da taýarlar bolý kerek. Mine, bular qazaqstandyqtar dastarhanynyń negizin quraidy», - dep jazdy Baqyt Sultanov Facebook paraqshasynda.
Ministrdiń atap ótýinshe, 22 naýryzda Qazaqstan Respýblikasynda tótenshe jaǵdai kezinde áleýmettik mańyzy bar taýarlardyń birneshe túrin, iaǵni, qaraqumyq, bidai uny nemese bidai-qara bidai uny, qant, kartop, sábiz, repa, qyzylsha, piiaz, qyryqqabat, kúnbaǵys tuqymy men kúnbaǵys maiyn el aýmaǵynan áketýge tyiym salyndy.
«Biz úshin búgingi kúni ishki naryqty úzdiksiz qamtamasyz etý asa mańyzdy. Memleket basshysy atap ótkendei, kez-kelgen talpynystyń jolyn kesýge qatań tiym salynatyn bolady. Qajet bolǵan jaǵdaida memleket keibir áleýmettik mańyzy bar taýarlarǵa baǵany memlekettik retteýdiń obektivti qajetti tizbesin aiqyndaidy. Sonymen birge, azyq-túlik óndirisiniń qunyn arzandatý boiynsha da sharalar qabyldanady: Prezident aýyl sharýashylyǵy ónimderi men azyq-túlik ónimderine QQS-ty ýaqytsha tómendetý, asa mańyzdy import boiynsha kedendik bajdardy joiý jóninde tapsyrma berdi. Biz qazaqstandyq óndirýshilerge osy kezeńdegi úzdiksiz jumystary úshin riza bolýymyz kerek. Men taǵy da ózderińizden ótine suraimyn. El basshylyǵy elimizdiń barlyq qalalary men eldi mekenderinde tirshilikti qamtamasyz etý úshin asa mańyzdy taýarlarǵa qatysty irkilis bolmaýy úshin barlyq jaǵdaidy jasaidy. Biraq jalǵyz ǵana ákimshilik resýrspen buǵan qol jetkize almaimyz. Osyǵan bailanysty, qurmetti óndirýshiler, Sizderden azamattyq yntymaqtastyqty saqtap, ishki suranysty negizgi áleýmettik mańyzdy azyq-túlik taýarlarymen qamtamasyz etýge kómektesýdi suraimyn. Bizdiń saýda kerýenimiz eń aldymen qazaqstandyq dúkenderge baǵyttalýy tiis», - dedi Baqyt Sultanov.
Sonymen qatar, ol qazaqstandyq óndiris ónimderin eksportqa shyǵarý memlekettiń mańyzdy mindeti bolyp qala beretindigin, tipti osyndai jaǵdaida da memleket júk tasymaly úshin shekaralardyń ashyq bolýyn jáne eksporttyq jetkizilimderdiń saqtalýyn qamtamasyz etetindigin basa aitty.
«Budan basqa, otandyq óńdelgen taýarlardy jyljytý úshin shyǵyndardy óteýge ótinimder jinalýda. Koronavirýs álemdik ekonomikaǵa joiqyn soqqy jasady. Biraq ol óndirýshiler úshin «múmkindikter terezesin» ashady: eksporttyq naryqtarǵa áser etý salalaryn qaita bóledi. Biz olardy oryndy paidalana alamyz degen úmittemin. Men Qazaqstan taiaý ýaqytta barlyq qiyndyqtardy eńsere alatynyna senimdimin jáne qurmetti óndirýshiler, Sizderdi jáne bizdiń barlyq azamattarymyzdy osy qiyn ýaqyttan aman ótý úshin birlesip áreket jasaýǵa shaqyramyn», - dedi ol.
