Búgin Premer-Ministr Baqytjan Saǵyntaevtyń tóraǵalyǵymen ótken QR Úkimeti otyrysy aiasynda aǵymdaǵy jylǵy memlekettik menshiktegi nysandardy jekeshelendirýdi júrgizýdiń barysy qaraldy, dep habarlaidy "Ult aqparat".
Qarjy ministri Baqyt Sultanov Jekeshelendirýdiń 2016-2020 jyldarǵa arnalǵan keshendi josparyna barlyǵy 877 nysan engizilgenin baiandady. 1 qazandaǵy jaǵdai boiynsha 441 nysan satylymǵa qoiylsa, onyń 291 nysany 112,7 mlrd teńge somaǵa satyldy.
Satylǵan nysandardyń: satý baǵasy 8,3 mlrd teńge bolatyn respýblikalyq menshiktegi 23 nysan, satý baǵasy 33,1 mlrd teńgeni quraǵan kommýnaldyq menshiktegi 162 nysan jáne satý baǵasy 71,3 mlrd teńge bolatyn kvazimemlekettik sektordyń 106 nysany. Budan ózge, 211 nysan qaita uiymdastyrý jáne taratý kezeńinde.
Osylaisha, qaita uiymdastyrylatyn jáne taratylatyn nysandardy esepke alǵanda Keshendi jospardy oryndaý aǵymdaǵy merzimge 74,3% quraidy.
Jalpy 2017 jylǵa 473 nysandy ótkizý josparlanǵan, onyń ishinde búgingi tańda 251 nysan satylymǵa qoiyldy, 55,6 mlrd teńge somaǵa 112 nysany satyldy. 115 nysan qaita uiymdastyrý jáne taratý kezeńinde. Osylaisha, jyl sońyna deiin 107 nysandy ótkizý qajet.
Nysandardy satýdyń nátijeliligin taldaý nátijeleri jalpy teńgerimdik quny 96 mlrd teńge kezinde 291 nysandy ótkizý somasy 112,7 mlrd teńgeni qurady.
Eń úzdik nysandardy ótkizý máselesi boiynsha 2017 jylǵa 24 nysandy ótkizý josparlanǵan, onyń ishinde 20 nysan ulttyq holdingter men tórt nysan respýblikalyq menshikke tiesili. Olardyń qazirgi ýaqytta 6-ýy satyldy jáne 11-i satylymǵa qoiyldy — bul «Samuryq-Qazyna» UÁQ segiz nysany men «Báiterek» UBH úsh aktivi.
Respýblikalyq menshiktegi eń úzdik tórt nysan boiynsha kelesi jumys júrgizilýde:
«Astana qonaq úii» AQ, «Ulttyq ǵylymi meditsinalyq ortalyq» AQ jáne «Qazmedteh» AQ nysandary boiynsha — baǵalaý júrgizýge táýelsiz konsýltanttar tartyldy jáne qazirgi ýaqytta baǵalaý boiynsha is-sharalar aiaqtalyp qaldy;
«Astana Halyqaralyq áýejaiy» AQ boiynsha — «Kókshetaý aviakompaniiasy» AQ qosý arqyly qaita uiymdastyrý boiynsha jumys júrgizilýde, jekeshelendirý túri boiynsha QR Úkimeti qaýlysynyń jobasy ázirlendi.
Ulttyq ekonomika birinshi vitse-ministri Rýslan Dálenov «Samuryq-Qazyna» qorynyń aktivterin básekeli ortaǵa berý úderisiniń tiimdiligin qamtamasyz etý jáne ony jedeldetý maqsatynda «Ulttyq ál-aýqat qory týraly» zańǵa túzetýler engizildi.
Budan ózge, Memleket basshysynyń tapsyrmalaryna sáikes Biýdjet kodeksine jáne «Memlekettik múlik týraly» zańǵa respýblikalyq menshikti jekeshelendirýden túsken qarajatty Ulttyq qorǵa berýdi, sondai-aq ulttyq holdingter men ulttyq kompaniialardyń aktivterin básekeli ortaǵa berýdi qarastyratyn túzetýler engizilgenin baiandady.
Memlekettik organdardyń vedomstvoǵa qarasty uiymdardy túgendeý nátijeleri boiynsha memlekettik menshik pen kvazimemlekettik sektorda qalatyn, sondai-aq taratylýy tiis nysandar tizilimi jasaldy. Memlekettik menshikte saqtalatyn uiymdar tizimi 6523 uiymnan turady, olardyń 85%-yn áleýmettik sala uiymdary quraidy.
Qazirgi ýaqytta memlekettik organdar Memlekettik múlik tiziliminde árbir uiymǵa «memlekettik menshikte turaqty/ýaqytsha saqtaý», «taratý», «qaita uiymdastyrý», «jekeshelendirý» mártebelerin beredi. Aldaǵy ýaqytta memlekettik menshikte saqtalatyn uiymdar tizimi MJÁ men básekeli ortany damytýǵa qatysty qaita qaralady.
Osylaisha, qolǵa alynǵan sharalar kvazimemlekettik sektor nysandaryn jekeshelendirý úderisin zańnamalyq túrde jedeldetýge múmkindik berdi, sondai-aq MJÁ aiasynda úlgilik kelisimsharttar jasaýǵa kómektesti.
Sondai-aq, QR Úkimeti otyrysy barysynda «QazAgro» UBH basqarma tóraǵasy Nurlybek Málelov, «Báiterek» UBH tóraǵa orynbasary Aidar Arifhanov pen «Samuryq-Qazyna» UÁQ quqyqtyq súiemeldeý jáne táýekelder jónindegi basqarýshy direktory Ǵani Bitenov baiandama jasady.
