Atyraý oblysynyń qylmystyq ister jónindegi mamandandyrylǵan sotynda tórt adamnan turatyn otbasyn aiaýsyz óltirýge qatysty qylmystyq isti qaraý jalǵasyp jatyr, dep habarlaidy ult.kz.
Osy atyshýly is boiynsha basty aiyptalýshy qaza tapqan otbasynyń kúieý balasy, 29 jastaǵy Sultan Sársemaliev.
Tengrinews.kz taratqan málimetke sáikes, oǵan óziniń qaiyn atasy Maqsot Qarabalindi, qaiyn enesi Násip Óteshqalievany, sondai-aq olardyń eresek balalary Meiramgúl Qarabalina men Naýryz Muqanǵalievti óltirdi degen aiyp taǵyldy.
30 maýsymda memlekettik aiyptaýshylar Sársemalievke buǵan deiin taǵylǵan aiypqa engizilgen ózgerister men tolyqtyrýlardy jariialady. Osydan keiin sýdia Zarema Hamidýllina sottalýshyny aiyptaý aktisiniń jańa redaktsiiasymen tanystyrdy.
Sýdianyń habarlaýynsha, kisi óltirý epizodtary boiynsha aiyptaýǵa jańa saralaý belgileri engizilgen.
"Násip Óteshqalieva men Maqsot Qarabalindi óltirý epizody boiynsha aiyp Qylmystyq kodekstiń 99-baby 2-bóliginiń 13-tarmaǵymen - basqa qylmysty jasyrý maqsatynda jasalǵan kisi óltirý babymen tolyqtyryldy", - dedi sýdia Zarema Hamidýllina.
Sonymen qatar Meiramgúl Qarabalinany óltirý epizody boiynsha aiyp QR QK 99-baby 2-bóliginiń 3 jáne 10-tarmaqtarymen tolyqtyryldy. Tergeý nusqasy boiynsha, sal aýrýyna shaldyqqan jáne kórý qabileti boiynsha III toptaǵy múgedektigi bar jábirlenýshi dármensiz kúide bolǵan jáne qarsylyq kórsete almaǵan. Sondai-aq tergeý organdary qylmystyń motivi retinde áieldiń ata-anasy qaza tapqannan keiin politsiiaǵa júginý nietin atap otyr.
Taǵy bir ózgeris - aiyptaýdyń áleýmettik tólemderdi zańsyz alýǵa qatysty bappen tolyqtyrylýy.
"Áleýmettik tólemder men zeinetaqylardy zańsyz alý epizodtary boiynsha sottalýshynyń is-áreketi QK 190-baby 2-bóliginiń 4-tarmaǵymen - aqparattyq júie paidalanýshysyn aldaý arqyly jasalǵan alaiaqtyq babymen tolyqtyryldy", - dep málimdedi sýdia Zarema Hamidýllina.
Osylaisha, Sultan Sársemalievke jábirlenýshiler qaza tapqannan keiin eseptelgen áleýmettik tólemder men zeinetaqylardy zańsyz alýǵa qatysty alaiaqtyq aiyby qosymsha taǵylyp otyr. Epizodtardyń biri boiynsha shyǵyn kólemi naqtylanyp, 520 996 teńge boldy.
Budan bólek, buǵan deiin mal satý kezindegi alaiaqtyq retinde saralanǵan epizod QK 188-1-babynyń 1-bóligine - mal urlyǵy babyna qaita saralandy.
