7 qańtar kúni Irannyń Kerman qalasynda general Kasem Súleimanimen qoshtasý rásimi kezinde adamnyń kóptiginen aiaqqa taptalyp nemese qysylyp 50 adam qaza tapqan. Taǵy 200-den astam kisi jaralanǵan. Bul týraly jergilikti telearnalarǵa siltep AP aqparat agenttigi habarlady.
Generaldy aqtyq saparǵa shyǵaryp salýǵa óte kóp adam keldi. Myńdaǵan turǵyn Kerman ortalyǵyna jinalyp, Kasem Súleimanidi aza tutty. Qaraly kúnge bailanysty qalada 7 qańtar jumys toqtaǵan.
Kerman - Irannyń ońtústik shyǵysyndaǵy qala. Qaza tapqan generaldyń týǵan jeri.
Buǵan deiin genaralmen qoshtasý rásimi Tegeran qalasynda da bolǵan. Júz myńdaǵan adam jinalǵan sharada Súleimanige Irannyń rýhani kósemi aiatolla Áli Hamenei quran oqyǵan. Janazadan soń jinalǵandar "Amerikaǵa ólim" dep aiqailaǵan.
3 qańtarda Iran generaly Kasem Súleimani Irak astanasy Baǵdat qalasynda qaza tapty. Ol mingen kólikti AQSh áýe kúshteri dronmen atqylaǵan. Generaldy óltirý týraly buiryqty prezident Donald Tramp bergen. Vashington Súleimanidi "birinshi terrorist" jáne "júzdegen AQSh sarbazynyń ólimine sol jaýapty" deidi.
General Súleimani eldegi islam revoliýtsiiasy korpýsynyń "Quds" arnaiy jasaǵyn basqarǵan jáne Irannyń shet elderdegi áskeri operatsiialaryna jetekshilik etken.
7 qańtar kúni Iran parlamenti AQSh áskeri men Pentagondy "terror uiym" dep atady jáne sheshim biraýyzdan maquldady.
