Aqmola oblysy Kókshetaý qalasyna qarasty Krasnyi Iar eldi mekeninde sýitsid jasaǵandar bólek jerlenedi. Mundai bastamany Krasnyi Iar meshitiniń bas imamy Naýan Mútáluly kótergen, dep habarlaidy Sputnik Qazaqstan tilshisi.
Naýan Mútáluly alǵash ret bul bastamany óziniń týǵan aýyly Jańatilekte (Aqmola oblysy Zerendi aýdany) júzege asyrǵan. Keiin qyzmet babymen Krasnyi Iar eldi mekenine aýysqannan keiin, osy jerde de óz-ózine qol jumsaǵandardy bólek jerleý máselesin kóteredi.
"Óz-ózine qol jumsaǵandar kóbeiip ketkennen keiin, osyndai bastamany qolǵa aldyq. Úlken zirattan bólek, oqshaýlaý turǵannan keiin adamdarǵa oi salar dep úmittendik. Ábý Hanifa mazhabynda muny úlken kúná dep eseptep, janazasyn shyǵarady. Biraq tártibi boiynsha janazasyn eldiń patshasy, ákimi nemese bas imamdary shyǵarmaidy, jai qatardaǵy namazhan adamdar shyǵarady. Ondaǵy maqsat – munyń jek kórinishti amal ekenin kórsetý", — deidi bas imam.
Onyń aitýynsha, 2010 jyldan beri Krasnyi Iarda sýitsid jasaǵandar bólek jerlenip jatyr.
"Óz-ózine qol jumsaǵandardy ortalyqtan berilgen úlken zirattyń sheti, naǵyz buryshyna qoiǵyzdyq. Aralarynda birneshe metr oryn bar. Eldi mekenge kelip-ketken adamdardyń ózi "myna kisiler nege bólek jatyr" dep surap jatady. Shyny kerek, adamdarǵa úlken oi tastap jatyr, jemisin kórip jatyrmyz. Sýitsid jasamaq bolǵan birneshe adam raiynan qaitty", — deidi Mútáluly.
Imamnyń aitýynsha, jeti jyl ishinde 9-10 adam zirattyń shetine bólek jerlengen.
"Qol jumsaǵandardyń deni – jastar, degenmen úlkenderi de joq emes. Tipti 1942 jylǵy aqsaqal bar", — deidi ol.
Krasnyi Iar halqy mundai bastamaǵa bas kezinde qarsylyq tanytyp, shý shyǵarǵan. Keiin turǵyndarmen áńgimelesip, munyń máni men mańyzyn túsindirgennen keiin durys sheshim ekenin uǵypty.
"Bizdegi tártipti estigen adamdar, jaqyny óz-ózine qol jumsap qaitsa, basqa aýylǵa, alys jaqqa alyp ketip, sonda jerleidi. Sebebi bizdiń pozitsiiamyzdy biledi", — dep túidi sózin bas imam.
