اقمولا وبلىسى كٶكشەتاۋ قالاسىنا قاراستى كراسنىي يار ەلدٸ مەكەنٸندە سۋيتسيد جاساعاندار بٶلەك جەرلەنەدٸ. مۇنداي باستامانى كراسنىي يار مەشٸتٸنٸڭ باس يمامى ناۋان مٷتەلۇلى كٶتەرگەن, دەپ حابارلايدى Sputnik قازاقستان تٸلشٸسٸ.
ناۋان مٷتەلۇلى العاش رەت بۇل باستامانى ٶزٸنٸڭ تۋعان اۋىلى جاڭاتٸلەكتە (اقمولا وبلىسى زەرەندٸ اۋدانى) جٷزەگە اسىرعان. كەيٸن قىزمەت بابىمەن كراسنىي يار ەلدٸ مەكەنٸنە اۋىسقاننان كەيٸن, وسى جەردە دە ٶز-ٶزٸنە قول جۇمساعانداردى بٶلەك جەرلەۋ مەسەلەسٸن كٶتەرەدٸ.
"ٶز-ٶزٸنە قول جۇمساعاندار كٶبەيٸپ كەتكەننەن كەيٸن, وسىنداي باستامانى قولعا الدىق. ٷلكەن زيراتتان بٶلەك, وقشاۋلاۋ تۇرعاننان كەيٸن ادامدارعا وي سالار دەپ ٷمٸتتەندٸك. ەبۋ حانيفا مازحابىندا مۇنى ٷلكەن كٷنە دەپ ەسەپتەپ, جانازاسىن شىعارادى. بٸراق تەرتٸبٸ بويىنشا جانازاسىن ەلدٸڭ پاتشاسى, ەكٸمٸ نەمەسە باس يمامدارى شىعارمايدى, جاي قاتارداعى نامازحان ادامدار شىعارادى. ونداعى ماقسات – مۇنىڭ جەك كٶرٸنٸشتٸ امال ەكەنٸن كٶرسەتۋ", — دەيدٸ باس يمام.
ونىڭ ايتۋىنشا, 2010 جىلدان بەرٸ كراسنىي ياردا سۋيتسيد جاساعاندار بٶلەك جەرلەنٸپ جاتىر.
"ٶز-ٶزٸنە قول جۇمساعانداردى ورتالىقتان بەرٸلگەن ٷلكەن زيراتتىڭ شەتٸ, ناعىز بۇرىشىنا قويعىزدىق. ارالارىندا بٸرنەشە مەتر ورىن بار. ەلدٸ مەكەنگە كەلٸپ-كەتكەن ادامداردىڭ ٶزٸ "مىنا كٸسٸلەر نەگە بٶلەك جاتىر" دەپ سۇراپ جاتادى. شىنى كەرەك, ادامدارعا ٷلكەن وي تاستاپ جاتىر, جەمٸسٸن كٶرٸپ جاتىرمىز. سۋيتسيد جاساماق بولعان بٸرنەشە ادام رايىنان قايتتى", — دەيدٸ مٷتەلۇلى.
يمامنىڭ ايتۋىنشا, جەتٸ جىل ٸشٸندە 9-10 ادام زيراتتىڭ شەتٸنە بٶلەك جەرلەنگەن.
"قول جۇمساعانداردىڭ دەنٸ – جاستار, دەگەنمەن ٷلكەندەرٸ دە جوق ەمەس. تٸپتٸ 1942 جىلعى اقساقال بار", — دەيدٸ ول.
كراسنىي يار حالقى مۇنداي باستاماعا باس كەزٸندە قارسىلىق تانىتىپ, شۋ شىعارعان. كەيٸن تۇرعىندارمەن ەڭگٸمەلەسٸپ, مۇنىڭ مەنٸ مەن ماڭىزىن تٷسٸندٸرگەننەن كەيٸن دۇرىس شەشٸم ەكەنٸن ۇعىپتى.
"بٸزدەگٸ تەرتٸپتٸ ەستٸگەن ادامدار, جاقىنى ٶز-ٶزٸنە قول جۇمساپ قايتسا, باسقا اۋىلعا, الىس جاققا الىپ كەتٸپ, سوندا جەرلەيدٸ. سەبەبٸ بٸزدٸڭ پوزيتسييامىزدى بٸلەدٸ", — دەپ تٷيدٸ سٶزٸن باس يمام.
