Sýets kanalynda Ever Given konteiner tasýshy kóldeneń qairańdap qalǵannan keiin bir aptadan soń onda kemeler qozǵalysy qaita jandandy, dep habarlaidy dw.com.
Dúisenbi túnde kanal ákimshiligi sý arnasyna 110-nan astam keme shyǵady dep habarlady. Kanalǵa taiaý tusta bes júzge jýyq keme jinalyp qalǵan.
Triple E sanatyna jatatyn 400 metrlik konteiner tasýshy MV Ever Given Sýets kanalynyń ońtústik bóliginde 24 naýryzǵa qaraǵan kúni qairańǵa turyp qaldy. Qytaidan Niderlandyǵa qarai bettegen keme kúre sý jolynyń eki jaǵyndaǵy qozǵalysty tolyqtai buǵattap tastady. Konteiner tasýshyny jaldaǵan taivandyq Evergreen kompaniiasy bul jaǵdai aýa raiynyń qolaisyzdyǵynan týyndady dep otyr. Qatty jel ekpinimen keme óz baǵytynan aýytqyp ketken.
Qutqarý komandalary konteiner tasýshyny 29 naýryzǵa qaraǵan túni qairańnan shyǵardy. Ol úshin júk tasýshy kemeniń ainalasyn tereńdetip qazýǵa týra keldi.
1869 jyly ashylǵan Sýets kanaly Taiaý Shyǵystan Eýropa men AQSh-qa munai tasymaldaityn mańyzdy marshrýtqa ainalǵan. Ol - keme kóp ótetetin álemdegi eń mańyzdy saýda marshrýty. Onyń úlesine ǵalamdyq teńiz saýdasynyń 10 paiyzy keledi.
Kanaldyń uzyndyǵy – 160 shaqyrym, eni – 250 metr. Al tereńdigi – 20 metr.
Sarapshylardyń aitýynsha, Ever Given kemesiniń keptelisinen álem ekonomikasy kúnine on milliard dollar ziian shekti.
