Almaty qalalyq sottyń tóraǵasy Nurǵazy Ábdihanov tanymal ánshi, kompozitor Gaýhar Álimbekovany nege aqtaǵanyn túsindirdi, - dep habarlaidy Tengrinews.kz tilshisi.
Buǵan deiin Álimbekova alaiaqtyq úshin alty jylǵa bas bostandyǵynan aiyrylǵan bolatyn. Al búgin apelliatsiialyq sot úkimi boiynsha ánshi aqtalyp shyqty.
Sot otyrysynyń sońynda sýdia Ábdihanov nege mundai úkim shyǵarǵanyn aitty.
"Birinshiden, aiyptaý úkimin boljamdarǵa negizdep jasaýǵa bolmaidy. Sot talqylaý barysynda naqty dáleldemelerdiń jiyntyǵyn negizge alýy qajet. Birinshi sotta da, apelliatsiialyq sotta da biz mundai dáleldemeler tappadyq. Ekinshiden, sot alqasynyń otyrysynda Álimbekova sottalýshy Ordabaevamen birge top bolyp aldyn ala sóz bailanyspaǵany, jábirlenýshi Nazarovanyń aqshasyn ádeii jymqyrmaǵany anyqtaldy. Kerisinshe, sot otyrysynda anyqtalǵandai, Álimbekovanyń ózi de Ordabaevadan aldanyp, páter alý úshin qarajat bergen. Sóitip, aqshasynan jáne úsh birdei páterinen aiyrylǵan, - dedi sýdia Nurǵazy Ábdihanov.
Sot úkiminen keiin Gaýhar Álimbekova óz áserimen bólisip, halyq jinaǵan qarajat jaily pikirin aitqan bolatyn. Ol halyqtan aqsha almaitynyn, jinalǵan qarajattyń bárin keri qaitaratynyn málim etken.
