Nur-Sultan qalasy qylmystyq ister jónindegi sot alqasynyń sýdiasy Abai Kókjalov elordada jeńil relsti kólik júiesin (LRT) salý kezindegi urlyq týraly is boiynsha úkimniń nege kúshi joiylǵanyn túsindirip, isti prokýrorǵa qaitardy, - dep habarlaidy Tengrinews.kz.
"Sot alqasy apelliatsiialyq shaǵymdardyń dálelderin, sotqa deiingi is júrgizý sheńberinde jol berilgen kóptegen quqyqbuzýshylyqtar týraly ótinishterdi qarap, bul quqyqbuzýshylyqtardyń negizi bar dep paiymdaidy.
Birinshi satydaǵy sot sot tergeýiniń birjaqtylyǵy men tolyq bolmaýyna jol berdi, sotqa deiingi is júrgizý sheńberinde advokattardyń barlyq dálelderin, shaǵymdary men ótinishterin tekserýdi qamtamasyz etpedi", - dep málimdedi Kókjalov sotta.
"Birinshi quqyqbuzýshylyq: atalǵan qylmysty uiymdastyrýshylar Qanat Sultanbekov pen Talǵat Ardanǵa qatysty qylmystyq is jeke óndiriske durys bólinbegen. Bul adamdarǵa qatysty olardyń osy qylmystyń uiymdastyrýshylary ekeni týraly tujyrym jasaýǵa jol berilgen, qylmystyq is sotqa kelip túsken kezde olarǵa qatysty jeke is júrgizýge bólý týraly protsestik sheshim bolmaǵan.
Sonymen qatar, is materialdarynda sheteldik kompaniialardyń ókilderine qatysty aiyptaý aktileri boiynsha qylmystyq áreketter, atap aitqanda, olardyń aqsha urlaýǵa kómekteskeni týraly málimetter boldy. Biraq olarǵa qatysty qandai da bir is júrgizýge sheshim qabyldanbady", - dedi sýdia.
Onyń aitýynsha, osy is boiynsha keltirilgen zalal somasy bóliginde advokattardyń ótinishteri boiynsha qaishylyqtar joiylǵan joq. Alǵashqy jáne keiingi aýditorlyq qorytyndylar bir-birine qaishy keledi.
Sýdia advokattar bul dálelderdi birinshi satydaǵy sotqa bergenin aitty. Olar aýditorlardyń qorytyndysyn dálel retinde jaramsyz dep tanýdy suraǵan. Biraq sot olardyń ótinishine ruqsat bermegen. Sondyqtan osy quqyqbuzýshylyq boiynsha isti prokýrorǵa qaitarýǵa negiz bar.
"Sonymen qatar, birinshi satydaǵy sot bul is boiynsha zerttemegen zattai dáleldemeler máselesi osy is boiynsha túsiniksiz bolyp qaldy. Bul zattai dáleldemeler tek apelliatsiialyq satydaǵy sotqa kelip tústi. Birinshi satydaǵy sot bul dálelderge de tiisti baǵa bergen joq", - dep atap ótti Abai Kókjalov.
Eske salaiyq, búgin Nur-Sultan sotynyń sot alqasy elordada jeńil relsti kólik júiesin (LRT) salý kezinde urlyq týraly is boiynsha úkimniń kúshin joiyp, quqyqbuzýshylyqty joiý úshin isti prokýrorǵa qaitardy.
