Foto: Ukimet.kz
Astananyń mádeniet basqarmasynyń burynǵy basshysy Bolat Majaǵulov pen merdiger uiym ókiline qatysty sot sheshimi jariialandy, dep habarlaidy Ult.kz.
Sot Bolat Majaǵulovty asa iri kólemde biýdjet qarajatyn jymqyrǵany úshin Qylmystyq kodekstiń 189-baby 4-bóliginiń 2-tarmaǵy boiynsha kináli dep tanydy. Oǵan Esil ózenindegi "Kún" sýburqaǵynyń qurylysyna bólingen 1 milliard teńgeden astam qarajatty iemdendi degen aiyp taǵyldy.
"2016 jyly Astana kúnin merekeleýge arnalǵan "Kún" sýburqaǵyn salý kezinde sýburqaqtyń qurylysyna kelisim-sharttar memlekettik satyp alý rásimin júrgizbei jasalǵan. Sýburqaq jobalyq-smetalyq qujattamasyz jáne memlekettik saraptamadan ótpei turǵyzylǵan", – delingen sot habarlamasynda.
Sot sheshimimen mádeniet basqarmasynyń eks-basshysy Bolat Majagulov 8 jyl 6 aiǵa sottaldy.
Is boiynsha taǵy bir aiyptalýshy, merdiger uiymnyń ókili Mádi Qanapin 3 jyl alty aiǵa bas bostandyǵynan aiyryldy. Sondai-aq ol memleket qarjysyn jymqyrý (QK 189-babynyń 4-bóligi, 2-tarmaǵy) jáne qylmys jasaýǵa járdemdesý (QR QK-niń 28-baby 5-bóligi) boiynsha kináli dep tanyldy.
Sondai-aq sot Majaǵulov pen Qanapinnen 1 milliard 86 million teńge kólemindegi shyǵyndy óndirý týraly sheshim shyǵardy.
Prokýratýra burynǵy mádeniet basqarmasynyń basshysy Bolat Majaǵulovqa asa iri mólsherde senip tapsyrylǵan múlikti jymqyrǵany úshin 10 jylǵa bas bostandyǵynan aiyrýdy suraǵan edi. Bolat Majaǵulov ótken jyldyń qyrkúieginde qamaýǵa alynǵan bolatyn.
