Foto: TJM
Ulttyq volonterler jelisi jedel shtabynyń jumysy aiasynda elimizdegi 20 aimaqtyń árqaisysynda óńirlik volonterler front-keńsesi bazasynda call center quryldy, dep habarlaidy "Ult aqparat".
Bul týraly Mádeniet jáne aqparat ministrligi málimdedi.
Zardap shekkenderge kómek kórsetip, volonterlerdi bólýdi úilestirý úshin biryńǵai bailanys nómiri +7 708 706 4242 jumys istep tur.
Aqtóbe oblysy
Óńirde 4 myńǵa jýyq volonterlyq toptyń qatysýymen sý tasqynyna qarsy belsendi is-sharalar jalǵasyp jatyr.
Búginde olar sý basqan úilerden 2 myńnan astam turǵyndy qajetti kerek-jaraqpen birge evakýatsiialaýǵa kómek kórsetti, erikti taksi júrgizýshileri turǵyndardy evakýatsiialyq pýnktterge tegin tasymaldady. Sý tasqynynan zardap shekkenderge kómek jinaý júrip jatyr. Sońǵy táýlikte eriktiler 6000 adamǵa ystyq tamaq taratty. Jumys áli de jalǵasyp jatyr.
Aqmola oblysy
Sý tasqynyna qarsy is-sharalarǵa 200-den astam volonter qatysyp, zardap shekken 500-den astam azamatqa kómek kórsetildi. Sý basqan aýmaqtardyń turǵyndaryn evakýatsiialaý, TJD, basqa da qutqarýshy qyzmetkerlerge ystyq shai men tamaq uiymdastyryldy. Kókshetaý qalasynda kóktemgi sý tasqynynan zardap shekkenderge kómek kórsetý úshin, qajetti zattardy qabyldaý pýnktteri ashyldy.
Batys Qazaqstan oblysy
300-ge jýyq volonter TJD qyzmetkerlerimen birlesip, sý tasqynyna qarsy is-sharalarǵa qatysyp, evakýatsiialanǵan turǵyndarǵa jatyn oryndarymen jáne azyq-túlikpen qamtamasyz etip jatyr.
Qostanai oblysy
Eldi mekenderde 600 adamǵa ystyq tamaq uiymdastyryldy. Joǵary oqý oryndary men kolledj stýdentterin qosa eseptegende 200 volonter turǵyn úilerden sý shyǵaryp, turǵyndardy qaýipti jerlerden evakýatsiialyq pýnktterge jetkizip, azyq-túlik ónimderin tasymaldaý jumystaryn jasady.
Jalpy, eldegi aimaqtarda zardap shekkenderge kómek jinaý pýnktterine 20000 volonter jumyldyryldy. Sońǵy aqparat boiynsha 12 701 adam, onyń ishinde 4 728 bala evakýatsiialandy. Ýaqytsha qonystaný pýnktterinde 6 461 adam, onyń ishinde 2 570 bala bar. Tótenshe jaǵdai bastalǵannan beri 4,2 mln m³-tan astam erigen sý soryldy.
