Foto: Massaget.kz
"Qazaqstan halqyna" qory sý tasqynynan zardap shekkenderge jinalǵan qaiyrymdylyq qarajatynyń jalpy somasy jariialady.
"Qazaqstan halqyna" qoryna azamattar men kompaniialardan jinalǵan qaiyrymdylyq kólemi 4,72 milliard teńgege jetti", - delingen qor habarlamasynda.
Bir aptanyń ishinde qorǵa 2,18 milliard teńge tústi, dep habarlady qordaǵylar.
Qordyń habarlaýynsha, sońǵy jeti kúnde qazaqstandyq kásipkerler sý tasqynynan zardap shekken qazaqstandyqtarǵa kómektesýge zor úles qosty.
"Aqniet grýpp" aktsioneri Qairat Itemgenov 1,3 milliard teńge, al Nomad Life jáne Nomad Insurance saqtandyrý kompaniialarynyń jalǵyz aktsioneri Almas Myńbaev 450 million teńge bóldi.
"Qazaqstan halqy" qory memleket basshysynyń sý tasqynynan zardap shekkenderge kómek kórsetý týraly bastamasyn qoldaǵandardyń barlyǵyna alǵysyn bildiredi", - dep málimdedi qordaǵylar.
Qaiyrymdylyq jalǵasýda, jinalǵan qarajattyń barlyǵy apattan qiraǵan aimaqtarda úiler salýǵa jumsalady.
Qordyń qamqorshylyq keńesi buǵan deiin aýyldyq eldi mekenderge úi salýǵa 10 milliard teńge bólý týraly sheshim qabyldaǵan.
"Búgingi kúni qor Batys Qazaqstan (114 úi) jáne Soltústik Qazaqstan oblystarynyń (100 úi) ákimdikterimen sý tasqynynan zardap shekken azamattarǵa turǵyn úi salý týraly memorandýmdarǵa qol qoidy", - dep habarlady qor.
Jaqyn arada Qostanai, Aqtóbe jáne Aqmola oblystarynda qurylys júrgiziletin aýyldar men aýmaqtar anyqtalyp, osyndai memorandýmdarǵa da qol qoiylady.
Alaiaqtardan qorǵaný úshin qor qaiyrymdylyq úshin resmi saitta kórsetilgen shottar men derektemelerdi ǵana paidalanýdy surady.
