Foto: TJM
Búgin Senatta 2025 jylǵy kóktemgi sý tasqynyna daiyndyq máselesine arnalǵan Úkimet saǵaty ótti, dep habarlaidy Ult.kz Senat baspasóz qyzmetine silteme jasap.
Málimet boiynsha qalpyna keltirý jumystarynyń nátijesinde shamamen 9 myń úi jóndelip, 2 myńnan astam jańa turǵyn úi salyndy. Qosymsha 5 myńnan astam jyljymaityn múlik nysany satyp alyndy.
Senat Tóraǵasynyń orynbasary Jaqyp Asanov sý tasqyny máselesi elimizge biyl da asa mańyzdy bolyp qala beretinin atap ótti. Onyń aitýynsha, kóktemgi sý tasqyny jyl saiyn halyq pen infraqurylym úshin zor synaq bolyp otyr. Al 2024 jylǵy jaǵdai tabiǵi apattyń qanshalyqty joiqyn bolýy múmkin ekenin kórsetti.
«Ótken jyl biz úshin aýyr synaq boldy. Sý tasqynynan myńdaǵan otbasylar zardap shekti, úiler qulady, jol men kópir búlindi, áleýmettik jáne kommertsiialyq nysandar qirady. Prezidenttiń aralasýymen jedel sheshim qabyldanyp, barlyq mekemelerdiń úilesimdi jumysynyń arqasynda shyǵyndardy azaitýǵa, zardap shekkenderge kómek kórsetýge, infraqurylymdy qalpyna keltirýge múmkindik týdy. Alaida, eger aldyn alý sharalary ýaqytyly jáne tiisti deńgeide júrgizilse, kóptegen shyǵyndardyń aldyn alýǵa bolar edi. Basty mindet – tek sý tasqynynyń saldarymen kúresý emes, ony júieli túrde boldyrmaý», – dedi Palata Tóraǵasynyń orynbasary.
Senattyń Halyqaralyq qatynastar, qorǵanys jáne qaýipsizdik komitetiniń tóraǵasy Andrei Lýkin óz kezeginde sý tasqyny elimiz úshin asa kúrdeli máseleniń biri bolyp qala beretinin atap ótti. Onyń aitýynsha, ótken jylǵy buryn-sońdy bolmaǵan sý tasqyny ásirese batys jáne soltústik óńirlerdegi júzdegen eldi mekenge aýyr synaq boldy. Ol tabiǵi qubylystyń sebebi men saldaryn túsiný, sondai-aq olardyń aldyn alý jóninde tiimdi sharalar ázirleý barlyq ýákiletti organdardyń ortaq mindeti ekenin jetkizdi
«Búgingi sharanyń negizgi maqsaty – Memleket basshysynyń tapsyrmalary qalai oryndalyp jatqanyn bilý, gidrotehnikalyq qurylystar men gidrometeorologiialyq qyzmetterdiń jai-kúiin tekserý, sý tasqyny qaýpi joǵary aimaqtarda zańsyz qurylys máselesiniń qalai sheshilip jatqanyn anyqtaý. Sondai-aq, tótenshe jaǵdailardyń aldyn alý úshin qandai naqty sharalar qabyldanyp jatqanyn talqylaý mańyzdy», – dedi Andrei Lýkin.
Otyrys barysynda Tótenshe jaǵdailar ministri Shyńǵys Árinov 2024 jylǵy sý tasqynynyń saldaryna taldaý jasap, ótken kóktemde Qazaqstan sońǵy 80 jylda bolmaǵan aýqymdy sý tasqynyna tap bolǵanyn eske saldy. Bul apat 12 óńirde 12 myńǵa jýyq jeke turǵyn úi men 62 kópqabatty ǵimaratty sý astynda qaldyrdy. Onyń saldaryn joiý úshin qutqarýshylar, áskeriler, politsiia, Ulttyq gvardiia jumyldyrylyp, aviatsiia men injenerlik tehnika paidalanyldy. Nátijesinde 35 million tekshe metrden astam sý sorylyp, ózen arnalarynyń túbin tereńdetý jáne jaǵalaýdy bekitý boiynsha aýqymdy jumystar júrgizildi. Ministr ótken jylǵy sý tasqynyn taldaý negizinde 2025 jylǵy kóktemgi kezeńge belsendi daiyndyq júrgizilip jatqanyn atap ótti.
Sondai-aq, Sý resýrstary jáne irrigatsiia birinshi vitse-ministri Bolat Bekniiaz depýtattarǵa yqtimal sý basýdyń aldyn alý jóninde qabyldanyp jatqan tehnikalyq sharalar týraly baiandady. Sonymen qatar 2024 jyly Qazaqstan-Resei birlesken jumys toby qurylyp, transshekaralyq sý basseinderindegi gidrotehnikalyq qurylystardyń jumysyn úilestirýmen ainalysyp jatqany aityldy.
Depýtattar Úkimet saǵatynyń qorytyndysy boiynsha 2025 jylǵy sý tasqyny kezeńine jan-jaqty daiyndyqty jalǵastyrýdy, gidrotehnikalyq qurylystardy qarjylandyrýdy arttyrýdy jáne tótenshe jaǵdailardyń aldyn alýdyń zamanaýi ádisterin engizýdi usyndy.
