Kóktemgi sý tasqyny zardaptaryn joiý maqsatynda Jánibek aýdanynda tótenshe jaǵdai jariialandy, dep habarlaidy QazAqparat.
Jánibek aýdanynyń ákimi Azamat Safimalievtiń biylǵy 5 sáýirdegi №1 sheshimine sáikes Jaqsybai, Talov jáne Borsy aýyldyq okrýgteriniń aýmaǵynda jergilikti aýqymdaǵy tabiǵi sipattaǵy tótenshe jaǵdai jariialandy.
Aýdan ákimdiginen túsken málimetke qaraǵanda, tabiǵi sipattaǵy tótenshe jaǵdailardy joiýǵa aýdan ákiminiń orynbasary Jaqsylyq Abdolov basshylyq etedi.
BQO TJ departamenti málim etkendei, turǵyndary eń kóp zardap shekken Jaqsybai aýylynda 97 úidiń sýǵa ketkeni belgili.
«Qazirgi ýaqytta Jaqsybaida sý tasqyny zardaptaryn joiýǵa TJ qurylymdarynan 17 adam (2 tehnika, 4 júzý quraly, 7 motopompa), jergilikti atqarýshy organdardan 70 qyzmetker (3 tehnika) jumyldyrylǵan. Dalaǵa sý aidaý, qum salynǵan qaptarmen bekitý jumystary júrgizilýde. Sondai-aq baǵandar ornatylyp, 8 úige jaryq berildi. Aýyl mańyndaǵy temir kópir jóndelip, iske qosyldy», dep habarlady vedomstvodan.
Osylaisha, Batys Qazaqstan oblysynda tórt aýdanda (Qaratóbe, Shyńǵyrlaý, Bórli, Jánibek) tótenshe jaǵdai jariialanyp, soǵan sáikes tiisti jumystar atqarylýda.
