Qazaqstanda sý sharýashylyǵyn reformalaý josparlanýda. Bul týraly QR Ekologiia, geologiia jáne tabiǵi resýrstar vitse-ministri Sergei Gromov QR Jemqorlyqqa qarsy is-qimyl agenttiginiń saitynda ótken onlain suhbatta aitty, dep habarlaidy QazAqparat.
«Biz qazir Memleket basshysynyń biyl 24 qańtardaǵy Úkimet otyrysynda bergen tapsyrmasy boiynsha jumys istep jatyrmyz. Ol tapsyrma 2020-2030 jyldar aralyǵynda sý sharýashylyǵyn reformalaý baǵdarlamasy týraly boldy. Árine, biz sý resýrstaryn saqtap qalýǵa, ony qorǵaýǵa kóp kóńil bólemiz. Urpaǵymyzǵa sapasy da kólemi da jaqsy sý qaldyrýymyz kerek. Ol úshin ne isteý kerek? Biz álemdik tájiribeni zerttedik. 20-30 jyl buryn bizdiń elde 115 million tekshe metrge jýyq sýaǵar bolǵan.
Búginde ol 100 million tekshe metr ǵana. Geografiia institýtynyń ǵalymdarymen birigip eseptep kórsek, halyq sany óse berse 2030-2040 jyldarǵa qarai onyń kólemi 60-70 million tekshe metrge jetýi múmkin. Oǵan jol bermes úshin ne isteý kerek? Eń aldymen sý únemdeitin tehnologiialardy qoldanýymyz kerek. Óndiris oryndarynda sýdy tazalap, qaita qoldaný qajet», - deidi QR Ekologiia, geologiia jáne tabiǵi resýrstar vitse-ministri Sergei Gromov.
Onyń aitýynsha, qazirgi ýaqytta Ózbekstanda kúrish ósirýden bas tartyp jatsa, bizdiń elde kúrish ósirýdi jalǵastyrýda.
«Qazirgi ýaqytta kúrishtiń ornyna qant qyzylshasyn ósirý tiimdirek. Sondai-aq, Qazaqstanda tutynatyn sý baǵasy aitarlyqtai arzandatylǵan. Atalǵan baǵdarlamada sýdy únemdeýge úiretý úshin sý naryǵyn qurý kózdelgen. Bul sonyń ishinde aýyl sharýashylyǵy ónimderin shyǵarýshylarǵa qatysty», – deidi Sergei Gromov.
