Foto: Joǵary aýditorlyq palata baspasóz qyzmeti
Sýmen jabdyqtaý salasyndaǵy jobalarǵa tartylǵan halyqaralyq bankterdiń qaryzy tiimsiz jumsalyp jatyr. Bul týraly Joǵary aýditorlyq palatanyń tóraǵasy Natalia Godýnova málimdedi, dep habarlaidy Sputnik Qazaqstan.
Onyń aitýynsha, Eýropalyq qaita qurý jáne damý banki men Islam damý banki 2017 jyldan beri Qazsýshardyń 61 jobasyn 317 million dollarǵa qarjylandyryp jatyr.
Aýdit júrgizý barysynda bes jyl ishinde tek 18 joba tapsyrylǵany anyqtaldy, 37 joba iske asyrý kezeńinde, al 6 joba boiynsha jumys áli bastalmaǵan.
"Sebebi sol baiaǵy – sapasyz jobalaý jáne jaýapsyz merdigerler. Jobalardy iske asyrý merzimderin keshiktirý Qazsýshar shotynda 6,5 milliard teńgeniń jinaqtalýyna ákeldi. Biýdjet olardy rezervteý úshin qosymsha 1,7 milliard teńge tóledi. Buǵan qosa, teńge baǵamy tómendegen jaǵdaida qabyldanǵan mindettemelerdiń ulǵaiý qaýpi bar, óitkeni qaryzdardyń barlyǵy dollarmen", - dedi Godýnova Májilistiń jalpy otyrysynda.
Sondai-aq Eýropalyq qaita qurý jáne damý bankiniń qaryzdary boiynsha segiz joba aiasynda 3 mlrd teńgeden astam somaǵa satyp alynǵan jabdyqtar men salynǵan infraqurylym maqsaty boiynsha paidalanylmai otyr. Saldarynan josparlanǵan 4 myń gektarǵa jýyq sýarmaly jer aýyl sharýashylyǵy ainalymyna engizilmegen.
EQDB qaryzyn maqsatsyz paidalanýdyń taǵy bir mysaly – 1,5 milliard teńgege "Aqtóbe sý qoimasynan Sazdy ózeniniń arnasyna sý qubyryn salý arqyly Aqtóbe qalasy jasyl aimaǵynyń infraqurylym obektilerin damytý" jobasyn iske asyrý.
"Bul qaryz sýarý infraqurylymyn qalpyna keltirýge josparlanǵan, al is júzinde saiabaq aimaǵyn abattandyrýǵa jumsaldy. Árine, saiabaqtar qajet, biraq valiýtamen alynǵan qaryz esebinen emes", - deidi Godýnova.
Joǵary aýditorlyq palatanyń aýditorlyq sharalarynyń nátijeleri boiynsha Úkimet pen ókiletti memlekettik organdarǵa sý salasyn basqarýdyń tiimdiligin arttyrýǵa baǵyttalǵan 91 tapsyrma men usynym berilgen. Olardyń 41-i oryndaldy, qalǵany oryndalý barysynda.
