Batysqazaqstandyq qos sportshy Úndistannyń Bangalor qalasynda sý dobynan jasóspirimder arasynda Aziia chempionatynyń kúmis júldegeri atandy, dep habarlaidy QazAqparat.
Quramynda qos oraldyq Ulan Amangeldiev pen Daniil Artiýh bar qazaqstandyqtar ekinshi orynǵa ie bolýmen birge álem chempionatyna joldama aldy.
El quramasy birinshilik barysynda Irandy 9:6, Ózbekstandy 10:9, Qytaidy 13:7, Koreiany 16:10, Úndistandy 19:6, Shri-Lankany 27:1 esebimen utty. Tek 8:16 esebimen Japoniia quramasyna ǵana ese jiberdi.
Chempionat qorytyndysynda japondar chempion atansa, irandyqtar úzdik úshtikke ilikti.
Batysqazaqstandyq sý doby sheberleriniń mundai biikten kórinýine bapkerleri Nurlan Merǵaliev, Meiirman Muqanǵaliev, Damir Tóregeldievter kóp eńbek sińirdi.
On jeti jasar Ulan Amangeldievtiń aitýynsha, sý dobymen alty jyldan beri dendep ainalysyp keledi.
«Jeńiske qurama músheleriniń bári de óz úlesterin qosty. Birge shabýylǵa shyǵyp, qorǵana da bildik. Eń bastysy, kúmis júldemen birge álem chempionatyna beriletin joldamany da utyp aldyq. Endi elge oralǵaly jatyrmyz. Aitýly dodaǵa Daniil ekeýmizdiń qatysýymyz Oralda sý dobynyń jaqsy damyp kele jatqanyn kórsetedi. Aldaǵy ýaqytta da namysty qoldan bermeýge tyrysamyz», - dedi U.Amangeldiev.
