QR Eńbek jáne halyqty áleýmettik qorǵaý ministri Birjan Nurymbetov 42500 teńge járdemaqynyń kimderge berilmeitinin túsindirdi, dep habarlaidy "Ult aqparat".
«Memlekettiń biýdjetinen zeinetaqy, járdemaqylar, ataýly áleýmettik kómek nemese saqtandyrý qorynan tiisti tólem alyp júrgender 42500 teńge almaidy. Olar beiresmi jumys istep júrgender qataryna jatpaidy. Eger de olar resmi jumys istep júrse, olar úshin jumys berýshi ótinish bere alady. Resmi jeke kásipkerligi bolsa, jeke kásipker retinde de ótinish berýge múmkindigi bar. Ekinshiden, Tótenshe jaǵdai kezinde biryńǵai jiyntyq tólem tólep, milliondaǵan adamdar óziniń beiresmi jumys istegenin rastady. Biz olarmen habarlasyp, 70 myńǵa jýyǵyn jumyspen qamtý sharalaryna tartqan bolatynbyz. Eger de ol azamattar qazir jumys istep jatsa, árine olar bul joly 42500 teńgeni ala almaidy», - dedi ministr Ortalyq kommýnikatsiialar qyzmetinde ótken brifingte.
Al jaqyn kúnderi jumystan shyǵyp ketkenderge Jumyspen qamtý ortalyǵyna habarlasý kerek. Bul ortalyq turǵyndarǵa ashyq vakansiialardy nemese basqa jumyspen qamtý sharalaryn usynady. Eger de esh jumys laiyq kelmese, úsh kúnde jumyssyz retinde tirkeledi jáne avtomatty túrde Memlekettik saqtandyrý qorynan jumyssyzdyqqa qatysty basqa tólem 6 ai boiy tólenedi.
«Stýdentter men dekrette júrgen áielderge taǵy da túsindirip ketsem. Arnaiy 42 500 teńge tóleýge «Stýdent», «Dekrettegi áiel» degen sanattar joq. Iaǵni, stýdentke stýdent bolǵany úshin járdemaqy tólenbeidi. Ótkende de solai bolǵan. Biraq eger de stýdent jaldanyp jumys istese, karantin kesirinen aqysyz demalysqa jiberilse, ol úshin jumys berýshisi ótinish bere alady. Al eger stýdent jeke kásipker bolyp, ai saiyn BJT tólep júrgen kásipker bolsa, ol jaǵdaida da 42500 teńge alady. Al endi osy kúnge deiin beiresmi jumys istedim dep bir ret BJT tólegen stýdentter 42500 teńge ala almaidy», - dedi B. Nurymbetov.
Sonymen birge, dekrette júrgen áielderge ereje ózgerissiz qalatyn bolady.
«Bala bir jasqa tolǵansha dekrettegi áiel memleketten nemese saqtandyrý qorynan járdemaqy alyp júredi. Sondyqtan, olarǵa 42500 teńge berilmeidi. Al endi bala bir jastan asqan bolsa, jumysqa shyǵyp, karantinge bailanysty aqysyz demalysqa jiberse, árine járdemaqy ala alady. Eger onyń jeke kásipkerligi bolyp, turaqty túrde BJT tólep, jumysy toqtap qalsa da 42 500 teńge ala alady. Ótkendegi TJ kezinde bir ret BJT tólep, beiresmi jumys istegenin rastaǵan áielder de 42500 teńge ala alady», - dedi Birjan Nurymbetov.
