Foto: Gazeta.rý
Qazan aiynyń sońynda Stepnogorskte er adam jas qyzdy urlap áketip, bir aiǵa jýyq seksýaldyq quldyqta ustaǵany belgili boldy. Jábirlenýshiniń týysy tergeýdiń ádil júrgizilýin talap etip, dabyl qaqty, dep habarlaidy Ult.kz Stan.kz-ke silteme jasap.
Týysynyń aitýynsha, jábirlenýshi altyn óndiretin ken ornynda kúzetshi bolyp jumys istegen. Sol jerde birge isteitin áriptesi ony aldap, úilenýge ýáde berip, anasyna da kezdesip, senimine kirgen. Qazan aiynyń sońynda qyz “jigitim jibermei jatyr” dep habarlaǵan soń bailanys úzilgen.
Týystarynyń sózinshe, kúdikti qyzdy belgisiz jerde ustap, tamaq pen sý bermei, azaptap, esirtki qoldanýǵa májbúrlegen, uiqydan aiyrǵan. Jábirlenýshiniń jaqyndary er adam jalǵyz bolmaǵan bolýy múmkin dep kúdiktenip otyr.
“Ol naǵyz tozaqtan ótti. Ápkem terezeden áreń qashyp shyqqan. Aiaqtary jaralanǵan, ústinde kiim joq, qansyraǵan kúii kóshede ótip bara jatqandardan kómek suraǵan. Qazir Stepnogorsk aýrýhanasynda jatyr”, – dep jazdy Threads qoldanýshysy.
Aitýynsha, qyz ábden qaljyraǵan, júre almaidy, janassa da dirildep, jylai beredi. Dárigerler “aýyr jaǵdaiyn ýshyqtyrmaý úshin” týystaryn kirgizbei otyr, biraq tergeýshi men ýchaskelik inspektorǵa shekteý joq.
Týystary jábirlenýshiniń jaǵdaiyn “óz erkimen boldy” dep kórsetýi múmkin dep alańdaidy. Sonymen qatar aýrýhanada áli qajetti saraptamalar jasalmaǵandyqtan, seksýaldyq zorlyq faktisi rastalmaǵan.
Aqmola oblystyq Politsiia departamenti istiń Stepnogorsk qalalyq politsiiasynda tirkelgenin rastady. Qazirgi tańda qyz psihikalyq densaýlyq ortalyǵynda emdelip jatyr.
“Aýrýhanaǵa jetkizilgende onyń denesinen synǵan shynydan qalǵan jaraqattar, sondai-aq esirtki jáne alkogoldik masańdyq belgileri anyqtaldy. Jábirlenýshi taraptyń ýájderi men oqiǵanyń barlyq mán-jaiy muqiiat tekserilip, sońǵy protsessýaldyq sheshim qabyldanady. Azamattardan tek resmi aqparatqa senýdi suraimyz”, – dep habarlady vedomstvo.
