Qazaqstanda byltyr shamamen 163 myń adam qaitys boldy, bul aldyńǵy jylmen salystyrǵanda 30 myń adamǵa kóp. Ulttyq statistika biýrosynyń saitynda jariialanǵan málimet boiynsha, elde byltyr adam ólimi 2019 jylmen salystyrǵanda 22 paiyzǵa kóbeigen.
Ulttyq statistika biýrosynyń saitynda 2000 jyldan bergi adam ólimi kórsetkishi jariialanǵan. 163 myń – sońǵy 20 jylda tirkelgen eń joǵary kórsetkish.
Statistikaǵa súiensek, byltyr shilde aiy eń aýyr ai bolǵan, dál sol kezde elde aýrýhanalarda oryn qalmai, turǵyndar dene qyzýyn túsiretin dári tappai qinalǵan. Shildede túrli sebeppen 28 178 adam qaitys bolǵan, al 2019 jyly 12 420 adam ólimi tirkelgen.
Qazaqstan úkimetiniń resmi málimeti boiynsha, 2020 jyldyń naýryz aiynan beri koronavirýstan 2 626 adam qaitys bolǵan. Bul málimetke koronavirýs juqqanmen "ólimine basqa aýrý sebep boldy" delingen júzdegen adam ólimi qosylmaǵan. Budan bólek, Covid statistikasyna "koronavirýs pnevmoniiasynan" qaitys bolǵandar sany da engizilmegen.
Densaýlyq saqtaý ministrligi "koronavirýs pnevmoniiasyna" shaldyqqandar men odan qaitys bolǵandardy tamyz aiynan beri bólek eseptep keledi. Biraq elde koronavirýs pnevmoniiasyna shaldyqqandar onyń aldynda da baiqalǵan. Alty aidan astam ýaqyt ishinde elde 591 adam koronavirýs pnevmoniiasynan qaitys bolǵan dep aitylady. Tamyzǵa deiin odan qansha adamnyń qaitys bolǵany belgisiz.
Densaýlyq saqtaý ministrligi koronavirýs pnevmoniiasyn pnevmoniianyń basqa túrlerinen ajyratý qiyndyǵyn alǵa tartqan. Biraq 2020 jyldyń alǵashqy alty jarym aiynda aldyńǵy jyldyń osy kezeńimen salystyrǵanda ókpe aýrýyna shaldyqqandar sanynyń 3,3 paiyzǵa kóbeigenin de moiyndaǵan.
2020 jyldyń 1 qańtar men 15 shilde aralyǵynda Qazaqstanda 3 327 adam pnevmoniianyń jalpy túrinen qaitys bolǵan.
Aita keteiik, Ministrlik koronavirýs pnevmoniiasyn Dúniejúzilik densaýlyq saqtaý uiymynyń qysymynan keiin eseptei bastaǵan.
