قازاقستاندا بىلتىر شامامەن 163 مىڭ ادام قايتىس بولدى, بۇل الدىڭعى جىلمەن سالىستىرعاندا 30 مىڭ ادامعا كٶپ. ۇلتتىق ستاتيستيكا بيۋروسىنىڭ سايتىندا جارييالانعان مەلٸمەت بويىنشا, ەلدە بىلتىر ادام ٶلٸمٸ 2019 جىلمەن سالىستىرعاندا 22 پايىزعا كٶبەيگەن.
ۇلتتىق ستاتيستيكا بيۋروسىنىڭ سايتىندا 2000 جىلدان بەرگٸ ادام ٶلٸمٸ كٶرسەتكٸشٸ جارييالانعان. 163 مىڭ – سوڭعى 20 جىلدا تٸركەلگەن ەڭ جوعارى كٶرسەتكٸش.
ستاتيستيكاعا سٷيەنسەك, بىلتىر شٸلدە ايى ەڭ اۋىر اي بولعان, دەل سول كەزدە ەلدە اۋرۋحانالاردا ورىن قالماي, تۇرعىندار دەنە قىزۋىن تٷسٸرەتٸن دەرٸ تاپپاي قينالعان. شٸلدەدە تٷرلٸ سەبەپپەن 28 178 ادام قايتىس بولعان, ال 2019 جىلى 12 420 ادام ٶلٸمٸ تٸركەلگەن.
قازاقستان ٷكٸمەتٸنٸڭ رەسمي مەلٸمەتٸ بويىنشا, 2020 جىلدىڭ ناۋرىز ايىنان بەرٸ كوروناۆيرۋستان 2 626 ادام قايتىس بولعان. بۇل مەلٸمەتكە كوروناۆيرۋس جۇققانمەن "ٶلٸمٸنە باسقا اۋرۋ سەبەپ بولدى" دەلٸنگەن جٷزدەگەن ادام ٶلٸمٸ قوسىلماعان. بۇدان بٶلەك, Covid ستاتيستيكاسىنا "كوروناۆيرۋس پنەۆمونيياسىنان" قايتىس بولعاندار سانى دا ەنگٸزٸلمەگەن.
دەنساۋلىق ساقتاۋ مينيسترلٸگٸ "كوروناۆيرۋس پنەۆمونيياسىنا" شالدىققاندار مەن ودان قايتىس بولعانداردى تامىز ايىنان بەرٸ بٶلەك ەسەپتەپ كەلەدٸ. بٸراق ەلدە كوروناۆيرۋس پنەۆمونيياسىنا شالدىققاندار ونىڭ الدىندا دا بايقالعان. التى ايدان استام ۋاقىت ٸشٸندە ەلدە 591 ادام كوروناۆيرۋس پنەۆمونيياسىنان قايتىس بولعان دەپ ايتىلادى. تامىزعا دەيٸن ودان قانشا ادامنىڭ قايتىس بولعانى بەلگٸسٸز.
دەنساۋلىق ساقتاۋ مينيسترلٸگٸ كوروناۆيرۋس پنەۆمونيياسىن پنەۆمونييانىڭ باسقا تٷرلەرٸنەن اجىراتۋ قيىندىعىن العا تارتقان. بٸراق 2020 جىلدىڭ العاشقى التى جارىم ايىندا الدىڭعى جىلدىڭ وسى كەزەڭٸمەن سالىستىرعاندا ٶكپە اۋرۋىنا شالدىققاندار سانىنىڭ 3,3 پايىزعا كٶبەيگەنٸن دە مويىنداعان.
2020 جىلدىڭ 1 قاڭتار مەن 15 شٸلدە ارالىعىندا قازاقستاندا 3 327 ادام پنەۆمونييانىڭ جالپى تٷرٸنەن قايتىس بولعان.
ايتا كەتەيٸك, مينيسترلٸك كوروناۆيرۋس پنەۆمونيياسىن دٷنيەجٷزٸلٸك دەنساۋلىق ساقتاۋ ۇيىمىنىڭ قىسىمىنان كەيٸن ەسەپتەي باستاعان.
