Stambýldaǵy Reina klýbyna shabýyl jasaǵan adamnyń videoǵa túsip qalǵan beinesi.
Qyrǵyzstan memlekettik ulttyq qaýipsizdik komiteti (MUQK) "1 qańtar kúni Túrkiianyń Stambýl qalasynda bolǵan qarýly shabýylǵa qyrǵyz azamatynyń qatysy bar" degen aqparatty tekserip jatqanyn aitty.
MUQK ókili Rahat Sýlaimanovtyń Azattyqqa aitýynsha, Qyrǵyzstan bul derekke bailanysty Túrkiiaǵa arnaiy suraý salǵan. Ol qylmysqa kúdikti delingen adamnyń pasportynyń kóshirmesi dep internette jariialanǵan málimetti de tekserip jatqandaryn aitty. Keiin Qyrǵyzstannyń memlekettik tirkeý qyzmeti basshysy Taiyrbek Sarpashev te ol qujattyń kóshirmesin tekserip jatqandaryn málimdedi.
Al túrik politsiia kúdikti delingen adamnyń selfi-videosyn jariialap, sol shabýylǵa qatysy bar delingen segiz adamnyń ustalǵanyn habarlady.
Qańtardyń 1-i kúni túnde Stambýldaǵy Reina klýbyna jasalǵan qarýly shabýyldan keminde 39 adam qaza taýyp, 40-qa jýyq adam jaralanǵan.
