Stambýldaǵy "Dolmabahche" saraiynda Ýkraina men Resei arasyndaǵy kelissózdiń jańa raýndty bastaldy. Bul týraly Túrkiianyń "Anadoly" agenttigi habarlady. Eki eldiń delegatsiiasy Stambýlǵa keshe, 28 naýryzda kelgen, dep habarlaidy Azattyq radiosy.
Kelissóz aldynda Túrkiia prezidenti Rejep Taiyp Erdoǵan sóz sóilep, "Ádiletti beibitshilik - eki tarap úshin de jeńis, qaqtyǵysty jalǵastyrý eki tarapqa da paida ákelmeidi. Halyqaralyq qaýymdastyq Stambýldaǵy kezdesýden jaqsy sheshim kútedi" dedi.
Aqparat agenttikteriniń habarlaýynsha, Erdoǵan kelissóz aldynda reseilik oligarh Roman Abramovichpen sóilesken. Buǵan deiin keibir derekkózder Abramovichtiń kelissózge qatysatynyn aitqan edi.
Ýkraina syrtqy ister ministri Dmitrii Kýlebanyń sózinshe, Kievtiń maqsaty kemi "gýmanitarlyq máseleni sheshý", maksimým - atysty toqtatýǵa kelisý.
Britandyq Financial Times basylymynyń jazýynsha, eger Ýkraina ózin beitarap el dep jariialaityn bolsa, onda Kreml Ýkrainaǵa denatsifikatsiia jaily talap qoiýdan bas tartýǵa jáne Ýkrainanyń Eýropa Odaǵy quramyna enýine kelisim berýge ázir.
Eki tarap naýryzdyń basynda Belarýste kelissóz ótkizgen, keiin bul protsess videobailanys arqyly jalǵasqan edi. Stambýldaǵy kelissóz eki kún ótedi jáne jýrnalister qatyspaidy.
