Túrkiianyń Stambul qalasynda 26 jastaǵy qazaqstandyq Aisulý Bekmahanovanyń qazasyna bailanysty bir top áiel narazylyqqa shyqty. Olar boijetken qulaǵan kóshege jinalyp, qaiǵyly oqiǵanyń jan-jaqty tergelýin jáne kinálilerdiń zań aldynda jaýap berýin talap etti, dep habarlaidy ult.kz.
KTK telearnasynyń málimetinshe, jinalǵan áielder Aisulýdyń ólimin jai ǵana óz-ózine qol jumsaý oqiǵasy retinde qarastyrýǵa bolmaitynyn aityp, istiń barlyq mán-jaiy anyqtalýy kerektigin málimdedi. Olardyń pikirinshe, áielderdiń qaýipsizdigi men quqyqtary qorǵalýy tiis.
Aldyn ala málimet boiynsha, qaiǵyly oqiǵa ótken jeksenbide bolǵan. Aisulý ózi turyp jatqan ǵimarattyń balkony arqyly kórshi úidiń tóbesine ótpek bolǵan. Keiin onyń biikte otyrǵan sátindegi fotosy áleýmettik jelilerde tarady. Boijetkenniń kórshi ǵimarattyń shatyryna ótpek bolǵan kezde qulap ketkeni boljanyp otyr.
Aisulý oqiǵa ornynda kóz jumǵan. Qaiǵyly jaǵdaidan keiin onymen birge turǵan Resei azamaty jáne onyń súiiktisi ustalǵan. BAQ málimetinshe, olardan jaýap alynǵan soń, elden shyqpaý týraly qolhatpen bosatylǵan.
Buǵan deiin Qazaqstannyń Syrtqy ister ministrligi Túrkiiada Qazaqstan azamatynyń qaitys bolǵanyn rastaǵan edi. Jergilikti aqparat quraldarynyń habarlaýynsha, oqiǵa Stambuldyń Shishli aýdanynda bolǵan. Boijetken altynshy qabattyń balkonynan kórshi ǵimarattyń shatyryna ótpek bolǵan kezde qulap ketken. Onyń naqty qandai jaǵdaida kóz jumǵanyn tergeý anyqtaýy tiis.
