Óskemende «Oskemen Open 2026» halyqaralyq shahmat festivaliniń ashylý saltanaty ótti. Jarysqa qatysý úshin Qazaqstannyń shyǵysyna 16 elden 200-ge jýyq shahmatshy keldi, dep habarlaidy ult.kz.
Baǵdarlama eki týrnirden turady: FIDE Circuit 2026-2027 jarystar seriiasyna engizilgen Masters (reitingi keminde 2400 shahmatshylar úshin) jáne Open (reitingi 2400-ge deiingi shahmatshylar úshin).
Masters týrnirine qatysýǵa 16 elden 77 shahmatshy ótinim bergen, olardyń arasynda 22 halyqaralyq grossmeister (GM), áielder arasyndaǵy 1 halyqaralyq grossmeister (WGM) jáne 29 halyqaralyq sheber (IM) bar.
Tizimdi 2026 jylǵy 1 shildedegi jaǵdai boiynsha reitingi «2600» mejesinen asatyn bes grossmeister bastap tur. Olar: álemdik shahmat tájine úmitkerler týrniriniń qatysýshysy Andrei Esipenko (2678, FIDE), kóptegen halyqaralyq týrnirlerdiń jeńimpazdary men júldegerleri Maksim Chigaev (2648, Ispaniia) pen Shant Sargsian (2646, Armeniia), «Aktobe Open 2024» kúmis júldegeri Aleksandr Predke (2603, Serbiia) jáne «Almaty Region Open. Qonaev Cup 2025» jeńimpazy Aditia Mittal (2602, Úndistan).
Óńir namysyn grossmeisterler Denis Mahniov (2562), Aldiiar Ansat (2500), Qazybek Nógerbek (2494), Ramazan Jalmahanov (2478), Álisher Súleimenov (2476) jáne Edgar Mamedov (2459), sondai-aq halyqaralyq sheberler Arystanbek Orazaev (2493) men Daniial Sapenov (2490) qorǵaidy.
Áielder arasynda tájiribeli Polina Shývalova (2483, FIDE) men 16 jastaǵy Shýbi Gýptaǵa (2383, Úndistan) Liia Qurmanǵalieva (2361), Ásil Serikbai (2219), Aiarý Altynbek (2114) jáne Aiaýlym Qaldarova (2029) laiyqty básekeles bolady dep kútilýde.
Ashylý saltanatynda ShQO ákimi Nurymbet Saqtaǵanov óńirde buqaralyq sport pen joǵary jetistikter sportyn qoldaý boiynsha júieli jumystar júrgizilip jatqanyn atap ótti.
«Shyǵys Qazaqstan oblysynda dene shynyqtyrý jáne sportpen shuǵyldanýǵa arnalǵan 1 628 sport nysany jumys isteidi. Dene shynyqtyrýmen jáne sportpen turaqty túrde 313 961 adam ainalysady, bul oblys halqynyń 45%-yn quraidy. Shahmatpen 85 bapkerdiń jetekshiligimen 10 myńǵa jýyq sportshy shuǵyldanady», – dedi Nurymbet Saqtaǵanov.
Qazaqstan shahmat federatsiiasynyń vitse-prezidenti Marat Esenov týrnirdiń simvoldyq mánin tilge tiek etti. Keshe ǵana búkil álem Halyqaralyq shahmat kúnin atap ótse, búgin Óskemende ataqty sheteldik sportshylardyń qatysýymen aýqymdy týrnir jalaýyn kóterip otyr.
«Jalpy, Qazaqstanda shahmat óte qarqyndy damyp keledi. Turaqty ári keshendi jumystyń nátijesinde jaqsy kórsetkishterge qol jetkizip jatyrmyz. Memleket basshysy Qasym-Jomart Kemeluly Toqaev intellektýaldy ult qalyptastyrý qajettigin basa aitqan bolatyn, bul oraida shahmattyń qosar úlesi zor. Shahmatty damytýdyń 2027 jylǵa deiingi Úkimet qaýlysynda naqty kórsetkishter bekitilip, olar joǵary deńgeide oryndalýda. Búginde elimiz boiynsha 1500 mektepte shahmat sabaǵy júrgiziledi. Aldiiar Ansat esimdi sportshymyz grossmeister normasyn oryndaǵan 22-shi shahmatshy atandy. Basqasyn aitpaǵanda, ol Shyǵys Qazaqstan oblysynyń namysyn qorǵaidy», – dedi Qazaqstan shahmat federatsiiasynyń vitse-prezidenti Marat Esenov.
Masters týrniriniń qatysýshysy, grossmeister Aldiiar Ansat jarystyń mańyzdylyǵy men qarsylastardyń deńgeii joǵary ekenin atap ótti.
«Qarsylastar óte myqty, quram salmaqty. Reitingi 2 700-den asatyn grossmeisterler bar. Ózime artyq úmit artpai, tek laiyqty ári jaqsy oiyn kórsetip, reitingti kótergim keledi. Aldaǵy basty maqsat – osy jyldyń qyrkúiek aiynda ótetin shahmat olimpiadasynda óner kórsetý, sondai-aq 2550, keiin 2600 mejelerinen ótip, budan da joǵary kórsetkishterge jetý», –deidi Aldiiar Ansat.
Open týrnirine 122 sportshy tirkeldi. Masters týrniriniń kepildendirilgen júlde qory 45 mln teńge, Open týrniriniń júlde qory 5 mln teńge. Eki týrnir de klassikalyq ýaqyt baqylaýymen 90+30 formatynda (birinshi júristen bastap ár júriske 30 sekýnd qosyla otyryp, partiiaǵa 90 minýt) shveitsariialyq júie boiynsha 9 týrdan ótkiziledi.
«Oskemen Open 2026» erler men áielder arasyndaǵy klassikalyq shahmattan 2026 jylǵy Qazaqstan Kýbogynyń ekinshi kezeńi. Aqshalai júldelerden bólek, alǵashqy 20 oryndy ielengen qatysýshylar Kýbok esebine upai jinaidy. Úshinshi, qorytyndy kezeń 12-20 qazan aralyǵynda Atyraýda ótedi. Al final jeltoqsan aiynda Astanada uiymdastyrylady.
Jalpy kepildendirilgen júlde qory – 50 mln teńge (45 mln – Masters, 5 mln – Open). Óskemendegi bul festival osymen úshinshi jyl qatarynan ótip jatyr. Týrnirdi Qazaqstan shahmat federatsiiasy QR Týrizm jáne sport ministrliginiń, ShQO ákimdiginiń, ShQO Dene shynyqtyrý jáne sport basqarmasynyń, Ústel tennisi ortalyǵynyń, Freedom Holding Corp, Grand Games jáne Grand Mobile, Kazzinc, Qyzyq, «Emil» jáne «Arzu» kompaniialarynyń, sondai-aq aqparattyq seriktesterdiń: Eýraziia birinshi arnasy, DK News, Ult.kz, Sportinform.kz, Sport+, Qazsport, NewTimes, Bes.media, Kýrsiv qoldaýymen uiymdastyryldy.
