S.Asfendiiarov atyndaǵy Qazaq ulttyq meditsina ýniversiteti balalar juqpaly aýrýlary kafedrasynyń professory Lázzat Eralieva aqpan aiynda bastalatyn koronavirýsqa qarsy vaktsinatsiianyń qaýipsizdigine qatysty pikirimen bólisti, dep habarlaidy QazAqparat.
«Koronavirýs infektsiiasyna qarsy vaktsina kez kelgen ózge vaktsina siiaqty immýnobiologiialyq preparat ekendigin túsiný qajet. Onyń ózindik kórsetilimderi men qarsy kórsetilimderi bolady, sonymen qatar aǵzaǵa egilgennen keiin qandai da reaktsiiasy oryn alýy da múmkin. Aǵzaǵa vaktsina egilgen kezde antidene paida bolady. Antideneniń paida bolýy belgili bir reaktsiiamen qatar júrýi yqtimal. Adamdarda immýndyq qarsylyq ártúrli júrýi múmkin. Kóp jaǵdaida reaktsiia bolmaidy, bári qalypty ótip, adam erkin júre beredi jáne jumysyn jalǵastyra alady. Al keibir immýndyq qarsylyq kezinde dene qyzýy kóterilip, vaktsina salynǵan jer qyzarýy nemese isýi yqtimal. Biraq, bul da qalypty dúnie jáne aǵzanyń áreket etkendigin jáne antidene bóle bastaǵanyn bildiredi», - dedi meditsina ǵalymy.
Lázzat Eralieva osy oraida tańdaý nelikten Reseide shyǵarylǵan Spýtnik-V vaktsinasyna túsip otyrǵandyǵyn túsindirip berýge tyrysty.
«Eger aqpan aiynan bastap qazaqstandyqtarǵa egiletin naqty «Spýtnik-V» vaktsinasyna qatysty aitar bolsaq, qazirgi ýaqytta ol Reseide shamamen 1,2 mln adamǵa egildi. Jáne de birde bir jaǵymsyz reaktsiia bolǵan emes. Mundai reaktsiiaǵa eń aldymen anafilaksiialyq reaktsiia jatady. Virýstyq infektsiialardyń damý belgilerine uqsas kataraldy simptomdar baiqalýy múmkin. Degenmen, bul da qalypty jait. Adamnyń birneshe kún boiy dene qyzýy kóterilgen nemese tumaýratqan, azdap basy aýyrǵan jaǵdailar kezdesken. Alaida munyń barlyǵy 3-4 kúnniń ishinde ótip ketedi», - dedi dáriger.
Onyń atap ótýinshe, koronavirýs infektsiiasyn qarsy vaktsina alǵannan keiin spirttik ishimdik ishýge, saýnaǵa barýǵa, buryn dámin tatpaǵan azyq-túlikti jeýge bolmaidy. Sonymen qatar júrekke salmaq túsirmeý úshin kúsh qoldanylatyn sport túrlerimen ainalyspaýǵa keńes beriledi.
