Antigen testi oń nátije kórsetken Argentina prezidenti Alberto Fernandes koronavirýs juqtyrdy degen kúdikpen oqshaýlandy. Burynyraqta ol Reseide shyǵarylǵan koronavirýsqa qarsy "Spýtnik V" vaktsinasyn saldyrǵan edi.
62 jastaǵy saiasatker Twitter-degi jazbasynda keshkisin qyzýy sál kóterilip, basy aýyrǵanyn, sondyqtan test jasap kórýdi uiǵarǵanyn aitty. Qazir ol naqtyraq nátije kórsetetin PTR testiniń qorytyndysyn kútip otyr.
Argentina — "Spýtnik V" vaktsinasyn qoldanýdy alǵash bolyp maquldaǵan elderdiń biri. Eldiń retteýshi organdary preparatty 60-tan asqan adamdarǵa qoldanýǵa ruqsat bergennen soń, Fernandes qańtar aiynda ekpeniń alǵashqy dozasyn salǵyzǵan. Keiinnen onyń ekinshi dozany da salǵyzǵany aityldy.
Argentina prezidentiniń jazbasyna jaýap bergen "Spýtnik V" vaktsinasynyń Twitter-degi paraqshasy bolǵan jaitqa qynjylatynyn aitty jáne ázirleýshilerdiń tujyrymy boiynsha, bul ekpe adamdy Covid juqtyrýdan 91,6 paiyz, al onyń aýyr saldarynan 100 paiyz qorǵaitynyn habarlady.
Qazaqstan "Spýtnik V" vaktsinasyn 15 aqpanda tirkedi. Vaktsinalaý naýqany preparatty tirkeýden buryn-aq, 1 aqpanda bastaldy.
Reseidiń Nikolai Gamaleia atyndaǵy epidemiologiia jáne mikrobiologiia ǵylymi-zertteý ortalyǵy ázirlegen bul ekpe álemniń 59 elinde Covid indetine qarsy qural retinde tirkelgen. Resei biligi vaktsinany synaýdyń úshinshi kezeńi bitpei jatyp ony resmi tirkeýden ótkizgen, sol úshin ǵylymi qaýymdastyq bul ekpeniń qaýipsizdigi men tiimdiligine kúmán keltirgen. Keiin halyqaralyq The Lancet ǵylymi jýrnaly "Spýtnik V" ekpesi synaqtyń úshinshi kezeńinen keiin 92 paiyz tiimdilik kórsetkeni týraly maqala jazdy.
