Bir dozasy 9,4 dollar bolatyn QazVac vaktsinasy turǵanda 26 dollarlyq «Spýtnik V»-den nege bas tartpaimyz? Densaýlyq saqtaý ministri Aleksei Tsoi otandyq Youtube arnaǵa bergen suhbatynda osy jaittyń mánin túsindirdi, dep habarlaidy QazAqparat.
«Ýájińizben kelisemin. QazVac erekshe óndiristik jaǵdaidy qajet etetindikten, aiyna 50 myń doza ǵana alyp otyrmyz. Al bizge halyqtyń kóp bóligin neǵurlym jyldam vaktsinalaý kerek. Zaýyt iske qosylǵansha aiyna 50 myń doza salyp otyrsaq, kóp kútemiz. Bizge vaktsinalaý naýqanyn barynsha jyldam aiaqtaý kerek. Bul jerdegi másele osyǵan ǵana tirelip tur. Qazir biz úshin eń qundy nárse - ýaqyt. Árine, kúte turyp, jyl sońynda ǵana bárine QazVac egýge bolady. Biraq qazir vakinalap bitirmesek, kúzde virýstyń taǵy bir tolqyny keledi degen qaýip bar», - dedi ministr.
Aleksei Tsoi virýstyń úshinshi tolqyny kelse, qaitadan ekonomika toqtaitynyn aitady.
«Dál qazir bárimiz vaktsina alyp, maskany sheshetin kúnge jetýimiz kerek. Búkil álem qazir meiilinshe kóp vaktsina alyp, halyqty qamtamasyz etýge kúsh salyp jatyr. Buǵan deiin Reseiden vaktsinanyń bir dozasyn 26 dollarǵa satyp alǵan bolatynbyz. «Spýtnik V»-diń taǵy 3 mln dozasyn satyp alý týraly kelisimshart bar. Biraq onyń baǵasy 21,9 dollar bolady. Biz jeńildik aldyq. Qalǵan kólem osy baǵamen ákelinedi», -dedi Aleksei Tsoi.
